Hrikalega mikilvægur leikur fyrir bæði lið en það voru Fylkismenn sem voru gíraðri í byrjun og Grindvíkingar komust ekki upp brekkuna sem til varð. Sóknaraðgerðir gestaliðsins voru gríðarlega máttlausar allan leikinn.

Josip Zeba braut á Ragnari Braga Sveinssyni í upphafi leiks og vítaspyrna dæmd. Áætlanir Grindvíkinga fóru strax í vaskinn.

Fylkismenn þurftu að vinna til að spyrna sér frá fallbaráttu og það tókst. Enginn glæsibragur á spilamennsku liðsins en stigin þrjú eru allt það sem máli skiptir.

Sóknarleikur Grindvíkinga er bitlaus smjörhnífur eins og sést á því að liðið hefur skorað þrettán mörk í sumar. Enn verri fréttir fyrir Grindavík að nú eru auk þess brotalamir í varnarleiknum að koma upp. Það hljómar eins og örugg uppskrift að falli.

Helgi Mikael og hans teymi skiluðu inn frábærri frammistöðu í kvöld. Vítaspyrnudómurinn réttur eins og nær allar aðrar ákvarðanir.