Fyrstu 20 mínútur leiksins voru fjörugar og bæði lið fengu fín færi til að skora, þá sérstaklega Valskonur sem voru meira með boltann. Selfyssingar voru hinsvegar fastar fyrir og áttu nokkrar skemmtilega útfærðar skyndisóknir. Síðari hálfleikur var rólegri og bæði lið fengu færi. Hlín Eiríksdóttir nýtti eitt slíkt fyrir Valskonur og það dugði til. Hörkuleikur tveggja góðra liða en sigurinn sanngjarn heilt yfir.

Hlín skoraði eina mark leiksins þegar hún mætti eins og gammur á fjærstöng og skilaði misheppnaðri hreinsum Cassie Boren í netið. Frábær klárun og mikilvægt mark.

Valskonur halda sigurgöngu sinni áfram og sitja á toppi deildarinnar, taplausar með 40 stig eftir 14 leiki. Selfosskonur eru áfram í 4. sæti en horfa girndaraugum á 3. sætið sem þær munu freista þess að taka af Þór/KA í næstu umferð.

Það var engin að eiga leik lífs síns í kvöld en að sama skapi engin alveg úti að aka. Ég hefði verið til í að sjá meira frá reynsluboltunum Hallberu og Margréti Láru í liði Vals og eins átti Cassie Boren að gera betur í aðdraganda Valsmarksins þegar henni mistókst að hreinsa frá marki sínu og skallaði boltann þess í stað fyrir markaskorarann Hlín.

Mér fannst vanta aðeins upp á samræmið í dómgæslunni í seinni hálfleik en ég held að Steinar og félagar hafi gert rétt í að dæma ekki vítaspyrnur í upphafi leiks og hafi þar með verið með stóru atriðin á hreinu.