Það var mikið undir hjá báðum liðum. FH þurfti sigur til að tryggja sig upp um deild og Augnablik þurfti að minnsta kosti stig til að staðfesta áframhaldandi veru sína í Inkasso-deildinni. Heimakonur byrjuðu af krafti en andstæðingarnir efldust á meðan mark númer tvö lét bíða eftir sér. Augnablik var svo mun betra liðið lengst af í síðari hálfleik. Spilaði áhyggjulaust á meðan stressuðum FH-ingum gekk illa að finna sinn takt. Það lifnaði þó aðeins yfir þeim í blálokin og á leiknum og þeim tókst að finna mikilvægt jöfnunarmark. Stigið þýðir að Augnablik spilar áfram í Inkasso 2020 en leikmenn liðsins voru ekki síður svekktar en FH-konur með að hafa ekki tekið öll stigin sem í boði voru.

Tveimur mínútum eftir að FH náði forystunni átti Telma Ívarsdóttir, markvörður Augnabliks, magnaða vörslu. Hún kom þannig í veg fyrir að FH kæmist í 2-0 og það er óhætt að segja að leikurinn hefði spilast öðruvísi ef svo hefði orðið.

Augnablik tryggir áframhaldandi veru í Inkasso. FH-ingar halda áfram að hiksta á lokasprettinum. Liðið hefur haft þrjá leiki til að tryggja sig upp um deild en gengur bölvanlega að klára dæmið. Þær þurfa að sækja stig í Mosó í lokaumferðinni til að ljúka ætlunarverkinu.

Það var hrikalegt að horfa upp á FH-liðið bogna undan pressunni í seinni hálfleik. Leikmönnum gekk illa að tengja saman sendingar og liðið leit út eins og hauslaus her á köflum. Svona vel mannað lið á að gera miklu, miklu betur.

Tríóið var með stóru atriðin á hreinu. Ég var ekki alltaf sammála þeim með þau litlu en heilt yfir höfðu þau ágætis tök á leiknum.