Gæðin í FH liðinu skinu í gegn á tímabili í leiknum. Gjörsamlega tættu andlausa Vestmannaeyinga í sig á fyrsta klukkutímanum og hefðu alveg getað verið búnir að skora fleiri mörk en 6 eftir 60 mínútur. Það gerðist þó ekki og leikmenn liðsins slökuðu mikið á og buðu ÍBV í dans. Eyjamenn gengu á lagið og skoruðu góð mörk og náðu sér í virðingarverð úrslit úr hræðilegri stöðu.

Annað mark Garys var poachers mark af bestu gerð. Geðveik aukaspyrna Víðis Þorvarðarsonar smellur í skeytunum þaðan í bakið á Daða markverði FH og rúllar svo eftir línunni þar sem Gary mætir og setur boltann yfir línunna.

FH fer langleiðina til Evrópu með þessum sigri og græðir það eflaust eitthvað sárin eftir tap í bikarúrslitum. ÍBV er löngu fallið og spilar bara upp á stoltið.

Eins og úrslitin gefa til kynna var fátt um varnir í dag svo varnarlínur beggja liða fá þennan reit. Hvorug vörn getur verið stolt af sínum leik

Tók lítið eftir Vilhjálmi í leiknum. Var ekki að flauta á neinn óþarfa og hélt góðu floti á leiknum við erfiðar aðstæður.