Einstaklingsmistök og klaufaskapur réðu hér öllu. Bæði mörk Vals í leiknum komu eftir slæm mistök en það gerðu svo sem mörk Grindavíkur líka. Þau reyndust bara öllu dýrari mistökin sem Grindavík gerði.

Ætla að tiltaka tvö atvik eða öllu heldur atvik og tímabil í leiknum. Fyrst ber að nefna afar klaufaleg mistök Vladan Djogatovic í marki Grindavíkur þegar hann missir boltann í gegnum klof sér á skrautlegan hátt eftir skalla frá Hauki Páli frá vítateigslínunni. Hitt er svo síðustu 5 mínútur leiksins þar sem Grindavík óð í færum en tókst á einhvern ótrúlegan hátt ekki að skora. Skalli í stöng, bjargað á línu af eigin sóknarmanni og algjörlega trufluð markvarsla frá Hannesi í marki Vals. Hefði verið gaman að fá sigurmark og þar með einhverja lágmarksspennu í lokaumferðina.

Einfalt í dag. Grindavík er fallið en Valur er öruggt um sæti í Pepsi Max að ári.

Vladan Djögatovic mun sennilega ekki vilja sjá markið hans Hauks Páls aftur. Ótrúlega aulaleg mistök sem reyndust rándýr þegar upp var staðið.

Bara fínasti leikur hjá Helga. Spurning hvort Grindavík hafi átt að fá víti í fyrri hálfleik en ég læt það liggja á milli hluta. Stýrði leiknum annars með ágætum við erfiðar aðstæður og komst vel frá sínu.