Það kann ekki góðri lukku að stýra að mæta til leiks í seinni hálfleik. Gestirnir úr Mosfellsbæ vorum heillum horfnir fyrstu 45 mínúturnar og það nýttu heimamenn sér til hins ítrasta og gengu frá leiknum.

Deildar meiningar eru um fimmta mark Keflavíkur og eru margir á því að Helgi Þór Jónsson hafi verið kolrangstæður og markið því ekki átt að standa. Flaggið fór þó ekki á loft og markið því gilt. Í stuttu spjalli við fréttaritara að leik loknum svaraði Helgi því til að honum væri alveg saman hann hugsaði um það eitt að koma boltanum yfir línunna. Í öðrum fréttum er það að í seinni hálfleik var logn á Nettóvellinum, Kristinn Jakobsson sem var eftirlitsmaður á leiknum tjáði fréttaritara það að hann hefði aldrei á sínum ferli upplifað það á þessum velli og hann þyrfti að ná mynd af þessu því fólk myndi hreinlega ekki trúa honum öðruvísi.

Keflavík fær 3 stig og 4 mörk í plús, Afturelding 0 stig og 4 mörk í mínus. Ekkert sérstaklega flókið í 1.umferð. 21 umferð eftir og margt getur breyst.

Afturelding átti slakan dag sem heild. Kári Steinn Hlífarsson átti í miklu basli í fyrri hálfleik en hann var tekinn af velli í hálfleik ásamt Alexander Aroni Davorssyni. En versta daginn átti líklega Magnús Már Einarsson þjálfari Aftureldingar. Eftir erfiði vetursins getur ekki verið gaman að sjá lið sitt jafn andlaust og það var fyrstu 45 mínútur leiksins.

Ekkert frábær en ekkert slæmt hjá Arnari heldur. Vantaði á köflum upp á samræmi en það hafði á engan hátt á hvort liðið vann en líklega átti sigurinn að vera marki minni.