Leikurinn var nokkuð jafn og spennandi allan tímann. Þróttarar voru meira með boltann heilt yfir en Fylkiskonur sóttu hratt og náðu að setja inn tvö mörk. Það var þó engin uppgjöf hjá stelpunum úr Laugardalnum sem komu tvisvar til baka í leiknum og sóttu sitt fyrsta stig í töfluna.

Jöfnunarmark Mary Alice verður að vera atvik leiksins. Eftir að Bryndís Arna skoraði glæsilegt mark á 90. mínútu og virtist ætla að hirða öll þrjú stigin fyrir Fylki, þá hélt Mary Alice ekki og kom með þvílíka bombu utan af velli og smurði boltann upp í samskeytin fjær og tryggði Þrótti fyrsta stigið sitt í sumar.

Fylkir missir Blikana 2 stigum fram úr sér en sitja í 2. sætinu allavega á meðan Þór/KA og Valur hafa leikið sína leiki í þessari umferð. Þróttur nær í sitt fyrsta stig og skilur FH og KR eftir stigalaus á botni deildarinnar.

Sæunn Rós Ríkharðsdóttir var borin af velli á börum á 85. mínútu þar sem hún leit út fyrir að hafa meitt sig illa á hné. Það sást langar leiðir að hún var sárkvalin og vonum við að þetta hafi ekki verið eins slæmt og þetta leit út fyrir að vera.

Vel dæmdur leikur hjá Atla sem hafði góð tök á leiknum og var öruggur í sínum ákvarðanatökum.