Það var fátt um fína drætti í leiknum í dag. Leiknismenn voru mun meira með boltann og sköpuðu talsverða hættu úr föstum leikatriðum en fengu ekki mörg opin færi. Það var einhver hundur í mönnum og fóru talsvert mörg gul spjöld á loft í dag. Eins var töluverð rigning og aðstæður buðu kannski ekki upp á flottan fótbolta. Vestramenn komu aðeins framar á völlinn í seinni hálfleik og náðu að skapa sér 1-2 færi. Þeir eru væntanlega sáttari aðilinn eftir leikinn í dag.

Hammed Obafemi Lawal var nokkuð heppinn að fá ekki annað gula spjaldið sitt og þar með rautt á 58. mínútu. Það hefði verið erfitt fyrir Vestra að vera manni færri síðustu 30.mínutur leiksins

Leiknir er með fjögur stig eftir tvo fyrstu leikina. Vestri er kominn á blað með eitt stig eftir tap í fyrsta leik.

Nacho Gil átti ekkert sérstakan dag hjá Vestra. Hafði reyndar ekki mikið til að vinna með en Vestramenn vilja væntanlega fá meira frá honum í sumar.

Arnar Þór var með ágætis tök á leik þar sem talsverður hiti var í mönnum. Það fóru alls 9 gul spjöld á loft en Arnari tókst að róa menn niður nokkrum sinnum þegar allt virtist ætla að sjóða upp úr.