Skagamenn mættu áræðnir til leiks, það var mikil barátta í þeim og þeir gáfu Valsmönnum ekkert eftir. Þeir nýttu sér mistök í vörn Vals, skoruðu þrjú í fyrri hálfleik og vörðu stöðu sína vel í seinni hálfleiknum. Valsmenn minnkuðu muninn snemma í seinni hálfleik, en það kom aldrei nein hræðsla í lið ÍA. Þeir héldu bara áfram og kláruðu svo leikinn.

Ég ætla að segja annað mark ÍA sem Tryggvi Hrafn Haraldsson skoraði. Vá, hvað það var flott mark. Það gerði stöðu ÍA þægilegri og þetta var eiginlega lítil sem engin hætta eftir það.

Bæði lið eru með sex stig eftir fjóra leiki. Ég ætla að giska á það að Skagamenn séu sáttari með þá niðurstöðu.

Varnarlína Vals var afskaplega döpur. Magnus Egilsson gaf boltann frá sér trekk í trekk, Orri Sigurður gerði stór mistök í fyrsta markinu, Birkir Már og Orri litu ekki vel út í öðru markinu, Hannes leit ekki vel út í fjórða markinu... það var alltof auðvelt að spila í gegnum vörn Vals. Heimir og Túfa þurfa að fara yfir varnarleikinn, og margt fleira.

Egill Arnar dæmdi þennan leik bara mjög vel. Spurning hvort Marcus hefði átt að fjúka út af í fyrri hálfleik, en það hefði kannski verið heldur til strangur dómur. Heilt yfir mjög flott hjá honum.