Þróttarar voru einfaldlega betur skipulagðar, grimmari og hugrakkari í dag. Þær voru meira með boltann og áttu mun fleiri færi. Skoruðu einu marki meira en andstæðingarnir og sigurinn sanngjarn.

Lokamínúta fyrri hálfleiks var ROSALEG. FH vildi fá vítaspyrnu og Guðni þjálfari FH fékk rautt fyrir kröftug mótmæli. Nokkrum sekúndum síðar kom Stephanie Þrótti yfir. Svakaleg dramatík en eftir að hafa skoðað atvikið og ráðfært mig við fagfólk virðist hafa verið rétt hjá dómaranum að dæma ekki víti. Friðrika, markvörður Þróttar, var á undan Birtu Georgs í boltann og blakaði honum til hliðar.

Þróttarar sækja sinn fyrsta sigur og eru komnar með 4 stig. FH-ingar eru hinsvegar stigalausar á botni deildarinnar ásamt KR-ingum.

Guðni Eiríksson þjálfari FH missti hausinn algjörlega þegar liðið hans fékk ekki vítaspyrnu undir lok fyrri hálfleiks. Fékk fyrst gult spjald fyrir mótmæli en hélt áfram kvarta og fór meira að segja aðeins inná völlinn. Guðmundur dómari gat því ekki annað en vísað honum upp í stúku. Lélegt hjá þjálfaranum sem á að sýna betra fordæmi.

Eftir heilan helling af allskonar skilaboðum úr hinum og þessum áttum, spjalli við dómara og að hafa séð endursýningu af atvikinu umdeilda rétt fyrir hálfleik virðist dómarinn hafa haft rétt fyrir sér við erfiðar aðstæður. Stór plús fyrir það. Tríóið fær hinsvegar mögulegan mínus fyrir að hafa ekki tekið á því þegar Elísabet Freyja virtist stoppa Valgerði Ósk með því að toga í hárið á henni seint í leiknum.