Bara annað liðið mætti til leiks! Skagamenn skoruðu á þriðju mínútu og kláruðu leikinn á næstu 15 mínútum. 0-3 eftir 18 mínútur og eftir það var algerlega ljóst hver niðurstaðan yrði.

Fyrsta markið gaf tóninn. Hallur fær endalausan tíma til að senda inní, Viktor fær að stökkva óáreittur upp á fjær og skalla að marki, skallinn laus en lekur inn. Uppskrift af leiknum klár eftir 160 sekúndur.

Skagamenn lyfta sér a.m.k. um sinn í 2.sæti deildarinnar og hafa nú safnað 7 stigum af 9 mögulegum í síðustu umferðum. Gróttan situr rétt ofan við fallsæti og hefur nú fengið á sig 11 mörk í 3 heimaleikjum.

Varnarlína Gróttu og markmaður þurfa að leggja það á sig að horfa á fyrri hálfleikinn aftur. Þeir voru óöruggir, gáfu Skagamönnum endalausan tíma og svæði og slíkt bara einfaldlega gengur ekki í efstu deild. Ef Gróttan á að láta draum rætast um að vera áfram á meðal þeirra bestu næsta sumar verða þessir að girða sig í brók!

Tveir dómarar sáu um þennan. Vilhjálmur Alvar í fyrri, fór meiddur útaf í hálfleik og Gunnar Oddur Hafliðason tók við (mögulega fyrsti PepsiMax-leikur???). Einfaldur leikur að dæma en allar ákvarðanir litu vel út og "dómaraframkoman" á réttu róli.