Keflavík nýtti færin sem ÍA stúlkum tókst ekki að gera. Heilt yfir var leikurinn jafn og baráttan í fyrirrúmi. ÍA réði þó ferðinni í fyrri hálfleik og eru eflaust svekktar að hafa ekki sett mark. Fengu svo kalda vatnsgusu í andlitið sekúndum frá hálfleiksflautinu. Keflavík gekk svo á lagið í seinni hálfleik og setti tvö mörk en voru þrátt fyrir það aldrei sannfærandi gegn líflegum Skagastúlkum.

Innkoma Amelíu á 59.mínútu breytti leiknum. Keflavík var í miklu basli með baráttuglaðar skagastúlkur en Amelía gerði gæfumunin fyrir þær.

Keflavík heldur í toppsætið ásamt Tindastól með 13 stig og vegferðin í Pepsi Max 2021 heldur áfram. ÍA tapar sínum fyrsta leik í deildinni í sumar og situr í 5.sæti með 6 stig.

Keflavíkurliðið slapp með skrekkinn þrátt fyrir að eiga engan spes leik. Skagastúlkur geta sömuleiðis nagað sig í handarbökin að hafa ekki tekið fleiri markaskó með sér suður með sjó og sett fleiri mörk og þá sérstaklega í fyrri hálfleik þar sem þær réðu lögum og lofum.

Andri Vigfússon átti bara virkilega góðan dag með flautuna. Leikstjórn góð í leik sem fékk að fljóta vel. Dæmdi heilt yfir bara mjög vel.