Gríðarlega öflug innkoma Blika inn í seinni hálfleikinn gerði út um leikinn. Mörk breyta leikjum og Sveindís Jane skoraði tvö á tveimur mínútum. Hún kom Blikum þannig í draumastöðu til að klára leikinn. Valsliðið þurfti þá að sækja, vitandi af stórhættulegum framherjum Blika sem biðu klárar upp á topp ef Valskonur misstu boltann. Leikurinn var þó vissulega ekki búinn á 47. mínútu og Breiðablik sýndi af hverju liðið er ekki búið að fá á sig mark í sumar. Blikar vörðist af aga og skynsemi og hleyptu gestunum ekki í nein opin færi. Refsuðu svo þegar Valskonur voru komnar of hátt á völlinn og úr varnarskipulagi. RISA sigur og skýr skilaboð frá Blikum.

Markamínútan hennar Sveindísar var rosaleg. Skoraði tvö mörk á rúmri mínútu og gjörbreytti leiknum. Hildur Þóra Hákonar fær svo líka hrós fyrir frábæra varnarvinnu og geggjaða tæklingu sem kom í veg fyrir að Elín Metta slyppi í gegn í stöðunni 0-0.

Blikar eru í góðum málum með 5 sigra í 5 fyrstu leikjum sínum. Eru með markatöluna 19-0 og sjálfstraustið í botni. Valskonur eru nú með 5 töpuð stig og það gæti reynst of mikið í toppbaráttunni ef við skoðum hvernig deildin hefur farið af stað og hvernig hún hefur spilast síðustu ár. Það er þó auðvitað aðeins þriðjungur búinn af mótinu svo það getur ýmislegt gerst ennþá.

Íslandsmeistararnir gengu allar hundsvekktar af velli eftir skellinn. Gestirnir deila þessum vonda degi saman.

Tríóið komst vel frá sínu. Nokkur atriði hér og þar eins og gengur og gerist en ekkert sem hafði nein úrslitaáhrif á leikinn.