Sofandaháttur Grindvíkinga í uppbótartíma sem Afturelding refsaði þeim grimmilega fyrir. Það má líka færa fyrir því rök að frábær markvarsla Vladans í marki Grindavíkur hafi skilað þeim stigi þegar hann varði úr algjöru dauðafæri frá Andra Frey í fyrri hálfleik. Heilt yfir eru úrslitin líklega sanngjörn en bæði lið eflaust svekkt með stigið.

Það er þrennt sem ber að nefna hér. Annars vegar jöfnunarmark Aftureldingar á 91.mínútu. Grindvíkingar vilja meina að Guðgeir dómari hafi átt að stöðva leikinn vegna höfuðmeiðsla sem Gunnar Þorsteinsson hafi orðið fyrir í aðdragandanum. Verð að viðurkenna að ég sá ekki þegar Gunnar varð fyrir höfuðhöggi en efast þó ekki í eina sekúndu um heiðarleika þess góða drengs. Markið stendur þó og verður ekki breytt úr þessu. Hitt atvikið sem ber að nefna er gula spjaldið á Vladan markvörð Grindavíkur sem fékk gult spjald fyrir tafir þegar hann datt í léttar teygjuæfingar inn í teig þegar hann átti að vera framkvæma markspyrnu. Guðgeir dómari hafði lítinn húmor fyrir því og spjaldaði hann. Það þriðja var áhugaverð viðureign Alexander Davorssonar og Josip Zeba eftir að sá fyrrnefndi hafði brotið á Zeba sem lagðist í grasið og virtist meiddur. Alexander var alls ekki að kaupa það og tók léttan Mark Noble á þetta og lyfti Zeba upp af jörðinni sem brást heldur ókæða við. Eða eins og ágætur vallargestur orðaði það ,,Zeba varð svo reiður að hann læknaðist" Skemmtilegt atvik og báðir spjaldaðir en skildu að lokum í góðu.

Afturelding lyftir sér uppfyrir Þór í 5.sæti á markatölu en Þór á þó leik til góða. Grindavík situr í 7.sæti

Bæði lið áttu heilt yfir ágætis dag og í raun ósanngjarnt að ætla sér að taka leikmenn út fyrir sviga. Þjálfarar liðanna eru hins vegar báðir örugglega frekar svekktir. Annar þeirra með forystu þegar 90 mín slá á klukkuna en hinn fyrir þau færi sem fóru forgörðum í fyrri hálfleik.

Heilt yfir bara þokkalegt hjá Guðgeiri en óvissan með jöfnunarmarkið og aðdragandan situr aðeins í mér. Læt hann þó njóta vafans með það enda sá ég ekki umrætt atvik.