Tjú, tjú heyrðist í Blikalestinni sem hélt sínu striki í kvöld. Það eru gæði í hverri einustu leikstöðu í Blikaliðinu og þær eru óstöðvandi um þessar mundir. Skora fimm og fá ekkert á sig frekar en fyrri daginn. Liðið lítur hrikalega vel út. Vængbrotnir Þróttarar reyndu hvað þær gátu en Blikaliðið var einfaldlega nokkrum númerum of stórt.

Berglind Björg skoraði sína aðra þrennu í sumar og er markahæst í deildinni með 10 mörk eftir 6 leiki. Það var líka mjög svo áhugavert atvik eftir 13 mínútur þegar Þróttur þurfti að gera markmannsskiptingu. Það skildu fæstir hvað var að gerast því Friðrika markvörður hafði ekki lent í neinum meiðslum. Það var líka skrítið að sjá varamarkmanninn leysa hana af í Breiðablikstreyju merktri Telmu Ívarsdóttur. Áhorfendur áttu erfitt með að átta sig á því hver væri komin í markið og af hverju, en varamarkvörðurinn Agnes Þóra Árnadóttir var ekki á upphaflegu leikskýrslunni. Það kom svo upp úr krafsinu að hún hafði verið ræst út á síðustu stundu þar sem Friðrika var orðin veik og gat ekki spilað.

Blikar halda áfram sigurgöngu sinni. Eru komnar upp fyrir Val á toppi deildarinnar og eiga enn leik til góða. Þróttarar tapa sínum þriðja leik í sumar. Missa KR-inga upp fyrir sig og sitja í 7. sæti með 6 stig.

Friðrika Arnardóttir þurfti að fara útaf vegna veikinda snemma leiks. Hundfúlt fyrir hana.

Tríóið hafði það nokkuð huggulegt í kvöldsólinni í Kópavogi. Þurfti ekki að taka neinar stórar ákvarðanir. Þróttarar voru ekki kátir með nokkur smærri atriði undir lok leiks og fannst ekki samræmi í dómum Ásmundar. Ég get alveg tekið undir það en þetta voru engin stór atriði og allir búnir að gleyma þeim eftir leik.