Stutta útskýringin er svo sú að Breiðablik er besta lið landsins í dag. Hraðinn í vel drilluðu Blikaliðinu er gríðarlegur og liðin spiluðu á sitthvoru tempóinu þar til að Blikar gíruðu sig niður um einn til að loka leiknum í seinni hálfleiknum. Sjálfstraustið var í botni hjá gestunum á meðan hausinn var ekki alveg rétt stilltur hjá Fylkiskonum.

Þorsteinn Halldórsson þjálfari Breiðabliks var búinn að skjóta á Karólínu Leu fyrir að vera ekki komin á blað í deildinni í sumar. Hún svaraði þjálfaranum með tveimur góðum mörkum í dag. Hennar fyrstu mörkum í sumar.

Blikar eru óstöðvandi. Vinna enn einn leikinn sannfærandi og án þess að fá á sig mark. Sjö leikir. Sjö sigrar. Fylkiskonur voru taplausar fyrir leikinn en eftir að hafa hökt í tveimur síðustu leikjum kom skellur í kvöld. Þær halda 3. sætinu þrátt fyrir það. Sitja þar með 12 stig.

Fylkisliðið í heild sinni átti slæman dag, sérstaklega í fyrri hálfleik. Slóvenski senterinn Tjasa Tibaut var líklega týndust allra og tekin útaf í hálfleik. Af þessari frammistöðu að dæma mun hún ekki styrkja Fylkisliðið.

Þægilegt verkefni fyrir tríóið. Engar stórar ákvarðanir að taka.