Valsliðið er einfaldlega betra fótbolta lið eins og staðan er í dag. Þær voru þolinmóðar, héldu boltanum betur og voru með meiri gæði fram á við. Varnarlega átti FH liðið samt fína kafla.

Fyrsta markið kom Val á lagið og virtist að sama skapi slá FH stelpurnar út af laginu. Eftir að hafa haldið aftur af Valsliðinu í 36 mínútur skoraði Elín Metta eftir sendingu frá Hallberu og virtust FH missa aðeins einbeitinguna því stuttu seinna skoraði Hlín annað mark leiksins.

Úrslitin höfðu ekki mikil áhrif á deildina, Valur er enn í 2. sæti rétt á eftir Breiðablik sem er á toppnum. FH eru hinsvegar á botninum með 3 stig og þurfa því heldur betur að spýta í lófana ef þær ætla ekki að missa hin liðin of langt frá sér í baráttunni um að halda sér uppi í deild þeirra bestu.

Þrátt fyrir fínan leik á köflum var Telma virkilega klaufaleg í þriðja marki Vals þar sem hún missir boltann á milli fótanna eftir skot frá Bergdísi.

Þurfti svo sem lítið að hafa fyrir hlutunum í dag og fátt um vafaatriði en skiluðu sínu hlutverki vel.