Víkingar virtust hreinlega ekki hafa tekið eftir því að Þorvaldur hafi flautað leikinn á fyrr en eftir að Emi Atlason hafði skorað eftir rétt um mínútu. Tvenn klaufaleg varnarmistök leiddu af sér mark og að gefa liði eins og Stjörnunni forgjöf veit aldrei á gott. Stjarnan spilaði leikinn af skynsemi og er heilt yfir sanngjarn sigurvegari.

Rauða spjald Nikolaj Hansen var síðasta hálmstráið fyrir Víkinga sem höfðu legið talsvert á Stjörnunni í aðdraganda þess. Í lýsingunni tala ég um réttmætt gult spjald en eftir endursýningar sýnist mér að Þorvaldur hafi gert mistök. Niko er vissulega með hendurnar út frá sér þegar hann kassar boltann niður en í algjörlega náttúrulegri stöðu fyrir því. Réði alls ekki úrslitum en reyndist Víkingum en erfiðara að ætla sér að brjóta niður vörn Stjörnunar manni færri.

Stjarnan er áfram í Mjólkurbikarnum en Víkingar ekki. Bikarinn fær því annað heimili en Víkina í haust.

Halldór Smári Sigurðsson átti í basli í fyrri hálfleiknum og var tekin af velli í hálfleik. Ekki við hann að sakast um það þar sem hann er að stíga upp úr meiðslum og virkaði einfaldlega ekki klár.

Þorvaldur var á fínni braut í 70 mínútur í leiknum ef frá er talið olnbogi frá Hilmari Árna sem átti alltaf að vera spjald. Algjört óviljaverk hjá Hilmari þó sem er prýðisdrengur. Eftir 70 mínútur virkaði Þorvaldur hins vegar örþreyttur og línan fór í furðulegar áttir hjá honum sem bitnaði þó á báðum liðum. Set spurningarmerki við það að setja dómara sem er að ná sér í gang aftur á svona high intensity leik.