Selfoss-liðið gerði virkilega vel í kvöld. Voru þéttar, skipulagðar og lokuðu vel á helstu ógnir Blika. Síðast en ekki síst spilaði liðið með Selfosshjartanu og nýtti loksins eitthvað af færunum sínum! Það dugði til í nokkuð jöfnum fótboltaleik þar sem langbesta lið deildarinnar til þessa náði aldrei sínum besta takti.

Bæði mörk Selfoss gera tilkall hér. Liðið var bara búið að skora 10 mörk fyrir leikinn og það lá ekki í loftinu að Selfoss yrði fyrsta liðið til að skora gegn Blikum, hvað þá að skora tvö! Dagný Brynjarsdóttir skoraði fallegt jöfnunarmark með skalla í byrjun seinni hálfleiks og Barbára Sól gerði svo slíkt hið sama á lokamínútunum.

Þau þýða mikið fyrir sjálfstraust sigurliðsins sem hefur átt erfitt uppdráttar að undanförnu. Þau þýða líka að forskot Breiðabliks á toppi deildarinnar hefur minnkað niður í tvö stig og titilbaráttan er orðin galopin á nýjan leik.

Eftir tvo 7-0 sigra í röð og ótrúlega velgengi í allt sumar kom tap í Kópavoginum. Blikar muna varla hvernig er að tapa fótboltaleikjum og allir leikmenn og aðstandendur fara súrir á koddann í kvöld.

Þetta var krefjandi leikur fyrir tríóið. Bæði lið lögðu allt í sölurnar og hart var barist. Það var mikið af pústrum út um allan völl og einhver atriði sem manni fannst tríóið missa af. Blikar voru mjög ósáttir við tvö atriði. Annars vegar vildi heimaliðið víti þegar Rakel Hönnudóttir féll við í teignum. Hinsvegar var mark dæmt af Rakel eftir hornspyrnu. Það var erfitt að meta atvikin úr blaðamannastúkunni en sérlegir ráðgjafar undirritaðrar vildu meina að það hafi verið rétt að dæma ekki víti en að markið hefði átt að standa. Sel það ekki dýrara en ég keypti það.. Þetta verður skoðað í Pepsi Max mörkunum á fimmtudag!