Heimakonur mættu óhræddar til leiks og pressuðu gestina af krafti. Fyrri hálfleikur var nokkuð opinn og skemmtilegur og bæði lið sköpuðu sér fín færi áður en að Alexandra Jóhannsdóttir braut ísinn með laglegu skallamarki. Blikar náðu svo mun betri tökum á leiknum í síðari hálfleik og þar héldu Þróttarar ekki í við þær. Blikar skerptu á sóknarleik sínum og sýndu í hversu góðu líkamlegu formi þær eru í með því að spila á svakalegu tempói fram í uppbótartíma. Liðið bætti við þremur mörkum og það er gaman að því að tveir leikmenn skoruðu tvö mörk og tveir aðrir leikmenn lögðu upp sitthvor tvö mörkin. Þokkalegasta breidd í sóknarlínu Kópavogsliðsins.

Fyrsta mark leiksins er oft það mikilvægasta og það var svoleiðis í dag. Alexandra Jóhannsdóttir var búin að vera ansi ógnandi áður en henni tókst að brjóta ísinn með góðu skallamarki eftir rúmlega hálftímaleik.

Breiðablik svarar tapinu í síðasta deildarleik og fer í 30 stig. Eru stigi á eftir Val sem situr á toppnum en Blikar eiga leik til góða. Þróttarar eru áfram í 8. sæti með 10 stig og halda áfram að berjast fyrir lífi sínu í deildinni.

Það er erfitt að taka einstaka leikmenn út hérna því allar voru að reyna og leggja sig fram. Það er þó klassísk lausn að henda þessum vafasama titli á sóknarmanninn sem nær ekki að nýta færin sín. Stephanie Ribeiro var hetja Þróttar í síðustu umferð en náði ekki að klára færin sín í dag og tekur þetta á sig.

Blikar áttu líklega að fá víti í fyrri hálfleik og svo fannst mér nokkrar skrítnar ákvarðanir úti á velli.