Eyjamenn voru yfirspenntir í leiknum í dag, það var einhver ára yfir þeim sem var kannski ekki alveg hentug. Eins gaman og ég hafði af því að finna spennuna og lætin sem áhorfandi, þá væri líklega vænlegra til vinnings að einbeita sér að fótboltanum og gefa dómaranum smá pásu.

Þegar búist er við stórleik tveggja jafnra toppliða eins og í dag er alltaf pirrandi þegar mönnum er skellt niður á jörðina í upphafi leiks. Það gerðist eftir stundarfjórðung þegar Sigurður Arnar Magnússon fékk að líta rauða spjaldið fyrir brot innan teigs og víti. Líklega réttur dómur en þetta atvik breytti leiknum sem hefði geta orðið.

Framarar fara vel af stað á Íslandsmótinu eru á toppnum með fullt hús stiga, 6 stig og ætla greinilega að endurtaka frammistöðuna sem þeir náðu í fyrra. Heimamenn í ÍBV hafa mætt tveimur af bestu liðum deildarinnar og hægt að afsaka það að vera án stiga. Þeim bíður hinsvegar leikur við Aftureldingu í næstu umferð, lið sem spáð er fallbaráttu, og það er skyldusigur. Allt annað en það kallar á naflaskoðun.

Sigurður Arnar Magnússon fær að líta rauða spjaldið eftir korter fyrir að rífa í andstæðing innan teigs. Ekkert spes veganesti sem hann skildi eftir fyrir liðsfélagana þegar hann gekk af velli að vera manni færri gegn eins góðu liði og Fram er.

Nú bíða eflaust margir eyjamenn eftir að sjá Helga Mikael dómara fá slæma útreið hér í þessum dálki. Hann fékk erfitt verkefni í dag, viðureign tveggja af bestu liðum deildarinnar og þar innan um voru yfirspenntir leikmenn sem þurfti að taka á. Helgi leysti það oftast vel, einhverjum finnst vafamál með vítaspyrnudóminn og rauða spjaldið, jafnvel líka þegar Gonzalo fékk áminningu fyrir leikaraskap, en Helgi Mikael var þó vel staðsettur og tók sína ákvörðun í þeim tilfellum. Hann lyfti 11 gulum spjöldum og einu rauðu. Sem betur fer virðist á skýrslu KSÍ sem hann hafi dregið til baka spjaldið sem Alex Freyr Elísson fékk fyrir að reima skóna. Enda var það skrítin ákvarðanataka. Fyrst Helgi Mikael er til umfjöllunar hérna þá er kominn tími á hrós sem á ekki bara við um leikinn í dag heldur þá leiki sem hann hefur dæmt í sumar. Hann virðist vera breyttur frá því hvernig hann var á síðasta ári, því fyrir allar stórar ákvarðanir, tekur hann sér sinn tíma til að meta stöðuna og taka svo ákvörðun um hvað hann ætlar að dæma, eitthvað sem hann skorti áður. Vel gert!