Frábær og vel skipulagður varnarleikur Stjörnunnar skilaði þeim einhverju út úr þessum leik. Þeir lentu manni færri á 37. mínútu þegar Emil Atlason fékk að líta rauða spjaldið fyrir heimskulegt brot. Það tók þá enga stund að skipuleggja lið sitt manni færri og múra upp varnarlega og hvað sem dundi á þeim gekk lítið fyrir Fylkismenn að komast framhjá vörninni er frá er talið jöfnunarmarkið.

Á 37. mínútu leiksins lét Emil Atlason veiða sig í einhvern pirring og setti hnéð í Arnór Gauta Jónsson sem féll með tilþrifum. Verðskuldað rautt spjald og þarna sveik Emil liðsfélaga sína sem þurftu að vera manni færri í meira en helminginn af leiknum.

Því miður telja þessi úrslit of lítið fyrir bæði lið. Heimamenn í Fylki eru í 8. sætinu með 7 stig þegar þeir fara í tveggja vikna frí en gestirnir í Stjörnunni skoruðu loksins mark í kvöld, og fengu sitt þriðja stig. 11 sætið eftir þriðjung mótsins þegar þeir fara í frí er ekki eitthvað sem Stjörnumenn eiga að þekkja.

Helgi Valur Daníelsson átti fínan leik á miðjunni hjá Fylki en þegar hann kom inn í vítateiginn mátti stundum halda að hann kynni ekki fótbolta. Þegar boltinn barst í góðum færum náði hann ekki einu sinni að hitta boltann sem rúllaði framhjá þó hann reyndi að sparka. Ef allt hefði verið eðlilegt hefði hann jafnvel geta skipt sköpum í dag ef hann hefði náð að hitta boltann.

Mér fannst Villi ráða mjög vel við leikinn, og virkilega vel gert að taka eftir brotinu hjá Emil Atlasyni sem verðskuldaði rauða spjaldið og fékk það. Ég er samt ósammála hvernig hann tók á málinu þegar Djair Parfitt-Williams braut á Heiðari Ægissyni og verðskuldaði líklega rautt spjald. Villi gaf báðum gult.