Það virtist vera örlítið meira eldsneyti í tankinum hjá Kórdrengjum. Leikurinn var ekki áferðarfallegur og það var ekki mikið um færi, en Kórdrengir unnu baráttuna. Mark Þóris var svolítið í takt við allan leikinn. Þórsarar hentu sér fyrir þónokkur skot áður en Þórir náði svo loks að þvinga boltann í netið.

Markið sem dæmt var af Þór. Það ærðist allt á vellinum þegar Alvaro hélt að hann hefði jafnað. Kórdrengir höfðu stillt boltanum upp á miðjunni, tilbúnir að hefja leik að nýju þegar Sigurður Hjörtur flautaði og dæmdi markið af. Ákvörðunin var ekki vinsæl hjá heimamönnum.

Kórdrengir tylla sér, í það minnsta tímabundið, í 2. sætið í Lengjudeildinni með 14 stig og skilja um leið Þór svolítið eftir. Þórsarar hafa nælt í 7 stig í fyrstu 7 leikjunum og eru í 8. sætinu.

Sóknarleikurinn var ekki upp á marga fiska í dag. Hann var í raun jafn slakur og barátta liðanna var mögnuð. Talsvert misheppnaðar sendingar, þar sem að leikmenn settu boltann útaf algjörlega óáreittir.

Sigurður Hjörtur hafði góð tök á leiknum.