Markið sem Blikar skora í upphafi leiks virðist slá Selfyssinga útaf laginu og það leit út fyrir að liðið hafi við það misst alla trú á verkefninu. Það var ekkert að frétta af sóknarleik Selfyssinga fyrr en síðasta stundarfjórðunginn eða svo. Blikar voru alls ekkert að spila sinn besta leik í kvöld en liðið komst upp með það að spila á 70-80% hraða og gæðum enda buðu Selfyssingar upp á það.

Það verður að vera þessi algjöra reykistefna sem að var í gangi fyrir leik. Dómararnir færðu leikinn af aðalvellinum yfir á gervigrasið aðeins nokkrum mínútum fyrir leik. Tríóið treysti sér ekki til þess að sjá línurnar nægilega vel þar sem að mikil rigning hefur verið á Selfossi í dag. Dómararnir héldu tvo fundi með þjálfurum liðanna rétt fyrir leik og var hávær orðrómur um það að leiknum yrði frestað. Það vildi hinsvegar hvorugur þjálfarinn og leikurinn fór af stað í miklu roki og rigninu.

Breiðablik komið á þann stað sem liðið ætlar sér að vera restina af mótinu, á toppnum. Selfyssingar nú búnir að tapa tveimur leikjum í röð. Liðið á þó bikarleik næst og það eru fá lið sem elska bikarinn jafnmikið og Selfyssingar.

Sóknarlína Selfyssinga var ósýnileg framan af leik og í jafn þýðingarmiklum leik og þessum þá er það hreinlega ekki í boði. Brenna var lítið í boltanum og Selfyssingar þurfa svo sannarlega á henni að halda

Lítið út á störf dómaranna að setja í leiknum sjálfum. Mér fannst þó þessi atburðarrás í upphafi leiks afar sérstök og sérstaklega hversu seint allt gerðist. Þessar línur sáust alveg jafn illa þegar dómararnir mættu rúmum klukkutíma fyrir leik. Leikurinn þó afar vel dæmur.