Valskonur brugðust frábærlega við marki sem Fylkir skoraði snemma leiks. Þær létu það ekkert á sig fá og voru fljótar að snúa leiknum við. Frábærar hornspyrnur Dóru Maríu rötuðu beint á Mist Edvards og það breytti leiknum til hins betra fyrir Valskonur sem fara heim með þrjú stig úr sólinni í Árbæ.

Mist breytti auðvitað leiknum en ég ætla að skrá hér þriðja markið sem Cyera Makenzie Hintzen skoraði. Það fór með þennan leik og Fylkir átti aldrei möguleika eftir það.

Valur nær fjögurra stiga forskoti á toppi deildarinnar og er núna í kjörstöðu til að klára mótið með Íslandsmeistaratitli. Fylkir er að berjast fyrir lífi sínu og sá bardagi gengur ekki vel. Verða þær í Lengjudeildinni að ári?

Shannon Simon hjá Fylki var afskaplega slök inn á miðsvæðinu. Ég ætla líka að skrá þetta á varnarvinnu Fylkis í föstum leikatriðum. Mjög slakt og eitthvað sem þær þurfa að fara betur yfir. Varnarlína Fylkis var mjög slök og Tinna ekki sannfærandi í markinu. Helena Ósk og María Eva voru skástar hjá Fylki í þessum leik.

Mjög vel dæmdur leikur, eins og bara allir leikir sem ég hef farið á í íslenska boltanum í ár. Mikið hrós á flotta dómgæslu!