FH-ingar voru sterkari aðilinn í leiknum en gestirnir úr Kópavogi vörðust gríðarlega vel með sitt unga lið. Ungir leikmenn þurfa að gera mistök til að læra af þeim og ein slík mistök réðu úrslitum í dag. Telma Hjaltalín Þrastardóttir nýtti sér mistök í vörn Augnabliks til þess að gera sigurmarkið.

Sigurmarkið er auðvitað stóra atvikið í þessum leik, en skrái líka dauðafærið sem Augnablik fékk í byrjun leiks. Áhugavert að hugsa til þess hvernig leikurinn hefði spilast ef Augnablik hefði skorað í byrjun leiks og tekið forystuna.

FH færist nær þeirri Bestu. Þær eru með fjögurra stiga forystu á liðið í öðru sæti, HK, þegar fjórar umferðir eru eftir. Þær eru með átta stiga forystu á Tindastól í þriðja sæti, en Stólarnir eiga leik til góða. Augnablik er í áttunda sæti, en átta stigum frá fallsvæðinu.

Skrái þetta bara á þann sem skráði í leikskýrsluna fyrir hönd Augnabliks. Það var mikið í rugli þar hvað varðar númer á leikmönnum. Þetta er fyrsti leikurinn sem ég sé með þessum liðum í sumar þar sem ég hef verið erlendis og því þekki ég ekki alla leikmennina. Að það séu ekki öll númer skráð rétt á skýrsluna gerir það erfiðara fyrir þau sem fjalla um leikina. Má endilega passa upp á að þetta sé í lagi, takk. Hvað varðar leikmenn þá eru Kristin Schnurr og Sunna Kristín Gísladóttir örugglega mjög svekktar að hafa ekki skorað.

Soffía Ummarin Kristinsdóttir leysti þetta verkefni mjög vel, virkilega vel dæmdur leikur að mínu mati. Ekkert við hana sakast, kannski eitt gult spjald sem hún hefði getað gefið í fyrri hálfleik en annars ekkert.