Lið ÍBV spilaði leikinn af mikilli ástríðu, menn börðust fyrir hverjum bolta og þegar þeir unnu tæklingar áttu þeir það til að fagna ógurlega og hvetja hvorn annan áfram. Þessi ákefð var ekki til í liði gestanna. ÍBV beitti löngum spyrnum fram völlinn og nýtti hvert tækifæri til að hægja á hraðanum í leiknum með því að taka langan tíma í öll föst leikatriði. Þeirra leikplan gekk upp og ljóst að Hermann Hreiðarsson er að ná að snúa gengi liðsins við. Það er svona Hemma Hreiðars bragur á liðinu, og greinilegt að mönnum finnst gaman.

Eftir 13. mínútna leik skoraði ÍBV annað mark sitt í leiknum og gerði út um hann með marki Eiðs Arons Sigurbjörnssonar. Eftir þetta var aldrei séns á að FH myndi vinna sig inn í leikinn og hvað þá eftir að þriðja markið kom eftir hálftíma.

ÍBV sótti þarna þrjú gríðarlega mikilvæg stig í fallbaráttuna í deildinni og í raun margt sem bendir til þess að stigasöfnun þeirra muni halda áfram á næstunni enda mikill kraftur í liðinu. Það sama má ekki segja um FH liðið sem virkar áhugalaust og verður bara daprara með hverjum leiknum. Með þessu framhaldi gæti þeirra beðið sæti í Lengjudeildinni á næstu leiktíð.

Eiður Smári Guðjohnsen þjálfari FH kom með yfirlýsingar í vikunni um að FH væri á leiðinni til Vestmannaeyja í stríð og lofaði að það sæist á liði sínu í þessum leik enda búið að minna á það stöðugt á æfingum vikunnar. Þegar út í alvöruna var komið var ljóst að herinn sem ofurstinn tefldi fram hafði engan áhuga á verkefninu og virtist að það færi lítið í skapið á mönnum að fá á sig mörk ítrekað í fyrri hálfleiknum. Það virkar eins og Eiður Smári nái ekki til liðsins svo þeir spili eins og menn í svona mikilvægu verkefni. Það er erfitt að koma höndum á hvers vegna staðan er svo slæm og hún er í Hafnarfirði, þó er ljóst að vandamálið er ekki bundið við Eið Smára og hans þjálfarateymi sem hefur bara fengið þrjú stig, og skorað þrjú mörk, í fyrstu 8 leikjum sínum. Það gekk vissulega betur hjá Ólafi Jóhannessyni forvera hans en þó bara örlítið betur. Ólafur er núna á miklu flugi með Val og enn á ný að sanna gæði sín. FH-ingar þurfa líklega að fara að líta mun ofar í fæðukeðjuna næst þegar mönnum verður skipt út. Leikmannahópurinn er gríðarlega illa samsettur og það má til dæmis horfa á hver er það sem sér um að velja leikmenn í svona hóp. Tvö þjálfaraskipti á hverju ári undanfarin ár hjálpar heldur ekki til að mynda stöðugleika. Hvar liggur ábyrgðin þar. Hinn almenni félagsmaður ætti kannski að mæta á næsta aðalfund og láta til sín taka?

Vilhjálmur Alvar hafði fín tök á þessum leik og lítið upp á hann að klaga. Það kom mér þó á óvart þegar hann skilaði að lokum leikskýrslunni að hann hafi skráð mark FH sem sjálfsmark Eiðs Arons Sigurbjörnssonar. Mér sýndist boltinn vera á leið í markið þegar hann fór í Eið Aron.