Það var ekki mikið sem skyldi að í þessum leik. Bæði lið hefðu hæglega getað skorað í fyrri hálfleiknum. HK-ingar misstu einu sinni einbeitinguna og náðu Blikar að nýta sér það með því að skora eina markið í leiknum.

Ég ætla að skrá þetta á dauðafærið sem HK fékk í fyrri hálfleik. Hægt að tala um þetta færi í fleirtölu því HK fékk í raun þrjú færi í sömu sókninni. Hefði verið áhugavert að sjá hvernig leikurinn hefði spilast ef þeir hefðu skorað þar.

Breiðablik er komið í undanúrslit og mætir þar Víkingum í leik sem er beðið með mikilli eftirvæntingu.

Þessa útnefningu fá stuðningsmenn HK af augljósum ástæðum. Stór hópur hegðaði sér fáránlega í kvöld og þarf að líta duglega í spegil. Stemningin var stórkostleg en hegðun hjá hópi af stuðningsmönnum HK var óboðleg. Eitthvað sem þarf að skoða og bæta, þetta má ekki koma fyrir aftur. KSÍ - og HK líka - þarf að taka á þessum grafalvarlegu málum sem komu upp í kvöld og setja öflugt fordæmi. Stór hluti þeirra áhorfenda sem hegðaði sér illa í kvöld eru börn og þau þurfa jákvæðar fyrirmyndir sem mega koma áleiðis þeim skilaboðum að það sé til lína sem ekki skal fara yfir.

Fannst Erlendur dæma þennan leik vel. Hann og hans aðstoðarmenn voru með stóru atriðin á hreinu að mínu mati. Hann var með fína stjórn á leiknum heilt yfir, flottur dagur á skrifstofunni hjá honum. Hann hefði samt alveg mátt stoppa leikinn þegar stuðningsmenn HK fóru að syngja það sem þeir sungu, ef hann heyrði það. Þá hefði verið hægt að stoppa það strax. En annars mjög fínn dagur hjá honum.