FH byrjaði leikinn af krafti og tók forystuna snemma, en stuttu eftir það mark þá tók Breiðablik völdin á vellinum. Gestirnir fengu fjölda færa til að jafna metin og það tókst loksins seint í fyrri hálfleik. FH náði að núllstilla sig vel fyrir seinni hálfleik og baráttan var mikil síðustu 45 mínúturnar. Færin voru ekki mörg í seinni hálfleik og jafntefli niðurstaðan í þessum ágæta leik.

Jöfnunarmark Breiðabliks kom seint í fyrri hálfleiknum. Á þeim tímapunkti leit út fyrir að Blikar væru aldrei að fara að skora, en það tókst loksins þarna.

Breiðablik var á toppnum fyrir daginn en er núna í öðru sæti eftir að Valur vann 1-7 sigur gegn ÍBV í Vestmannaeyjum. Þetta verður áhugaverð barátta áfram á milli Blika og Vals, en bæði lið eru að styrkja sig vel í glugganum. Spútniklið FH er í fjórða sæti með 21 stig og horfir upp á við.

Andrea Rut Bjarnadóttir og Agla María Albertsdóttir fengu svo sannarlega færi til að skora í þessum leik, en þær fundu sig ekki alveg. Færanýting Blika í fyrri hálfleik var alls ekki góð.

Flottur leikur hjá dómarateyminu, komust vel frá sínu.