Eins og alltaf er það kóngurinn Elvis Prestley sem heilsar liðunum sem ganga nú inn á blautan Leiknisvöll. Aðstæður hér á Leiknisvelli eru eins haustlægðar-legar og þær mögulega gætu orðið.

Vindur - blautt - hryssingslegt og völlurinn verið betri (en á uppleið).

Já ef þú varst 50/50 á að skella þér þá reikna ég með að hafa endanlega sannfært þig um að koma...

Það fer að styttast í þetta. Flestir leikmenn að tölta inn til búningsherbergja eins og sakir standa. Stefán Logi rekur lestina enda maður sem tekur sína rútínu upp á tíu.

Af byrjunarliðunum er það helst í fréttum að Selfyssingar gera fjórar breytingar á liði sínu frá því í leiknum gegn Þrótti.

Útúr liðinu detta þeir Arnar Logi Sveinsson, lykilleikmaðurinn Ingi Rafn Ingibergsson, Svavar Berg Jóhannesson og Magnús Ingi Einarsson.

Inn í þeirra stað koma þeir Gilles Mbang Ondo framherjinn stóri og stæðilegi sem er búinn að taka út leikbann, Þormar Elvarsson, Gylfi Dagur Leifsson og Kristófer Páll Viðarsson.

Hjá heimamönnum er ein breyting frá því í leiknum í Ólafsvík en þar kemur Ingvar Ásbjörn Ingvarsson inn fyrir Aron Fuego Daníelsson.

Þess ber að geta að Aron Fuego er jafnframt vallarstjóri á Leiknisvellinum og er að taka síðustu yfirferð á marknetunum.

Liðin byrjuð að hrista sig saman hér á blautum Leiknisvellinum. Búið að stytta upp að vísu sem er jákvætt.

Lykilmenn
Selfoss

Stefán Logi Magnússon
Markmaður sem hefur margar fjörur sopið á lífsleiðinni. Þekkir fagið út og inn og kemur með hafsjó af reynslu í rammann. Stefán Logi þarf að vera tip top í öllum sínum aðgerðum í dag - enda hendir hann sér hiklaust út af línunni og í dag gætu aðstæður svo sannarlega refsað.

Kenan Turudija
Mikil gæði og styrkur í Kenan. Kominn með þrjú mörk í sjö leikjum - en öll mörkin komu í einum og sama leiknum. Selfyssingar þurfa stöðuga framlegð frá Kenan.

Ingi Rafn Ingibergsson
Hefur verið einn jafnbesti leikmaður Selfyssinga það sem af er í liði sem virðist glíma við talsverðan óstöðugleika. Kröftugur með boltann í fótunum og getur ógnað með hægri og vinstri fæti. Stórt hjarta sem slær fyrir liðið - lykilmaður ef Selfyssingar ætla að snúa þessu tímabili við.

---

Leiknir R.

Sólon Breki Leifsson
Ávallt ógn af Sóloni enda miskunnarlaus í sínum aðgerðum þegar boltinn er nærri. Sóknarleikur Leiknisliðsins er að einhverju leyti háður því að Sólon klári sitt og sé ferskur - þjónustan hefur upp á síðkastið verið góð og í leik sem þessum þarf Sólon svo sannarlega að stíga upp og klára sitt og gott betur en það. Hraði hans og áræðni á eftir að valda usla.

Bjarki Aðalsteinsson
Það mun mæða mikið á Bjarka og félaga hans Miroslav Pushkarov í dag. Leiknisliðið þarf á stórri nærveru Bjarka í dag bæði í lofti sem láði. Bjarki er klár lykilleikmaður í liðinu í dag.

Tómas Óli Garðarsson
Var sennilega besti leikmaður Leiknis gegn Víking frá Ólafsvík í síðustu umferð og þurfa heimamenn á snilli hans að halda í dag. Tómas Óli er óðum að nálgast gott form en hann var einn besti leikmaður Inkasso deildarinnar síðari hluta síðasta tímabils.

Síðasta umferð

Selfoss
Selfyssingar töpuðu í síðustu umferð gegn Þrótturum á heimavelli sínum 0-1 í leik þar sem Leiknismaðurinn Ólafur Hrannar Kristjánsson skoraði sigurmarkið.

Leiknir R.
Leiknismenn töpuðu gegn Víking í Ólafsvík 3-0 í leik sem var jafn og spennandi langtímunum saman og Leiknismenn rændir marki í fyrri hálfleik. En þegar upp var staðið var sigurinn sanngjarn.

Bæði þessi lið hafa ekki verið laus við sápuóperu stemmningu sem fæst lið kjósa að standa í þegar leiktíð er farin afstað.

Hjá heimamönnum var Kristófer Sigurgeirsson þjálfari látinn taka poka sinn eftir þrjú töp úr fyrstu þremur umferðum Inkasso deildarinnar. Þjálfaramál liðsins eru enn óleyst en í dag er það Þórður Einarsson (Doddi) sem er í brúnni þar sem Vigfús Arnar Jósepsson er staddur í Rússlandi. Vigfús hefur haldið um stjórnartaumana síðan í 4.umferð.

Hjá gestunum var svo Antonio Jose Espinosa Mossi sendur heim eftir að hafa gengið af velli gegn Haukum á Ásvöllum - sem er eitthvað sem gerist ekki á hverjum degi. Espinosa Mossi var svo réttilega sendur upp í næstu flugvél af landi brott - mögulega með tveimur eða þremur millilendingum áður en til Spánar var komið.

Bæði þessi lið finna sig því í talsverðum mótvind sem þau eru að reyna að vinna sig útúr og því ljóst að mikið er undir hér í dag enda viss flekaskil að þróast í Inkasso deildinni.

Bæði lið þurfa nauðsynlega á þremur stigum að halda til að eiga einhvern möguleika á að hífa sig upp töfluna.

Selfyssingar finna sig í 9.sæti deildarinnar með 7 stig og neikvæða markatölu upp á fimm mörk

Leiknismenn eru svo í 10.sætinu með 6 stig og neikvæða markatölu upp á fimm mörk.

Verið velkomin í þessa rituðu lýsingu á leik Leiknis og Selfoss héðan frá Leiknisvelli.

Aðstæður hér í Breiðholtinu eru erfiðar - en bjóða hinsvegar upp á helling af barning og tæknifeilum enda völlurinn rennandi blautur og smávægilegur vindur einnig til staðar til að setja mark sitt á leikinn.

Fjörugur leikur í vændum milli tveggja liða sem hafa farið illa af stað í Inkassodeildinni í sumar.