Killer combo-ið Lidija Anja Stojkanovic aðstoðarþjálfari HK/Víkings og Zoran Miljkovich eru mætt til að fylgjast með. Eins lætur Þorsteinn Halldórsson, þjálfari Blika, sig ekki vanta.

Það er samt enn alltof fámennt í stúkunni og ég hvet áhugafólk um góðan fótbolta um að drífa sig af stað.

Þvílíka blíðan. Liðin hafa lokið upphitun, eru á leið inn í klefa í lokaundirbúning. Góður playlisti, boltastelpurnar búnar að koma sér fyrir og allt klárt fyrir stórleikinn.

Byrjunarliðin eru klár eins og sjá má hér til hliðar. Ekkert sem kemur á óvart hjá Stjörnunni annað en að þjálfarinn er fjarverandi!

Ólafur Guðbjörnsson var víst búinn að bóka sig til Spánar löngu áður en að þessi leikur var færður til dagsins í dag og hann er því fjarri góðu gamni. Andrés Ellert verður við stjórnvölinn í dag.

Valsliðið vekur öllu meiri athygli. Þar fara Elín Metta, Dóra María og Stefanía á bekkinn. Ásdís Karen, Hlín og Pála koma inn.

Leikmenn til að fylgjast með í dag:

Stjarnan
Harpa Þorsteinsdóttir: Það þarf ekkert að kynna þessa konu. 219 mörk í 311 meistaraflokksleikjum tala sínu máli. Algjör lykilkona í liði Stjörnunnar. Búin að skora fjögur og leggja upp fimm í sumar. Tölfræðin segir okkur svo að hún hafi bæði átt flest skot á mark og flestar lykilsendingar í deildinni í sumar. Stórhættuleg.
Lára Kristín Pedersen: Einn ljósasti punktur Stjörnunnar í sumar. Er að eiga fantagott tímabil. Stjörnukonur leita mikið að henni í öllu uppspili og með hennar útsjónarsemi er hún einn besti "dreifari" deildarinnar. Auk þess er hún nautsterk í loftinu.
Telma Hjaltalín Þrastardóttir: Kom eins og stormsveipur inn í lið Stjörnunnar þegar á þurfti að halda. Er búin að koma við sögu í 7 leikjum í sumar og skora í þeim 6 mörk. Eldfljót með og án bolta, banhungruð í að standa sig á vellinum eftir langa fjarveru.

Valur
Málfríður Erna Sigurðardóttir: Reynsluboltinn hefur varla stigið feilspor í sumar. Kann fótboltann út og inn og reynsla hennar er mikilvæg í tengja saman nýja varnarlínu Vals. Staðsetur sig vel og skilar boltanum vel frá sér.
Stefanía Ragnarsdóttir: Framlag Stefaníu er oft vanmetið en hún er ótrúlega vinnusöm á miðjunni hjá Val, hleypur úr sér lungun í hverjum leik. Er einnig ótrúlega lunkin að þefa upp svæði til að stinga sér í og skapar mikla hættu í sóknarleik Vals.
Elín Metta Jensen: Topp 3 leikmaður í deildinni í sumar að mínu mati. Er búin að skora 9 mörk og leggja upp tvö í fyrstu 10 umferðum. Ótrúlega lunkin með boltann og illviðráðanleg þegar hún kemst í námunda við mark andstæðinganna.

Stjarnan hafði betur þegar liðin mættust í fyrri umferð. Vann þá nokkuð óvænt 3-1 þar sem magnaður fyrri hálfleikur skóp sigurinn.

Síðustu tvö tímabil hafa liðin skipt sigrunum á milli sín og það er spurning hvort að sú rútína heldur áfram. Það er nokkuð ljóst að Valskonur eru ekki búnar að gleyma leiknum í fyrri umferðinni og vilja bæta fyrir tapið.

Það er líka ljóst að Stjörnukonur koma fullar sjálfstrausts inn í leikinn. Nýbúnar að tryggja sig í bikarúrslit með flugeldasýningu gegn Fylki.

Liðin eru í 3. og 4. sæti deildarinnar og verða þar áfram sama hvernig fer hér á eftir. Valskonur eru í 3. sæti með 20 stig en Stjarnan í því fjórða með 16 stig.

Félögin eru líklega búin að fjarlægjast efsta sætið of mikið til að gera að því atlögu en berjast um það þriðja eins og staðan er í dag.

Útilokum þó ekkert. Það getur allt gerst í fótbolta og fari efstu tvö liðin að misstíga sig er mikilvægt að vera á tánnum og minnka stigabilið þegar færi gefst.

Er föstudagur?

Já! Og það er fótboltaveisla framundan.

Hér verður bein textalýsing frá stórleik Stjörnunnar og Vals í Pepsi-deild kvenna. Leik sem lokar 11. umferðinni.

Bríet dómari blæs til leiks á slaginu 19:15 og ef þú átt ekki heimangengt á völlinn þá er um að gera að fylgjast með hér á .net.