Leikmenn ganga hér til vallar! Sveinn Elías og Axel Kári fyrirliðar fremstir í flokki!

Liðin eru nú á fullu í upphitun. Styttist í leik!

Lárus Orri gerir tvær breytingar á Þórsliðinu frá jafnteflinu við Fram. Nacho Gil og Guðni Sigþórsson koma inn fyrir Inga Frey Hilmarsson og Jakob Snæ Árnason.

Binni Gests gerir eina breytingu frá sigrinum á Leikni. Andri Jónasson kemur inn fyrir Halldór Jón Sigurð Þórðarson.

Byrjunarliðin eru klár! Þau má sjá hér til hliðar

Ég virðist hafa jynxað veðrið. Það hefur aðeins bætt í vindinn og komin smá rigning. Það er samt næstum því alltaf gott veður fyrir norðan!

Það fara fjórir aðrir leikir fram í Inkasso deildinni í dag. Leiknir-HK, Þróttur-Magni og ÍA-Fram hefjast klukkan 18:00 eins og okkar leikur. Haukar-Njarðvík er svo klukkan 18:30. Veisla í dag!

Guðni Þór Ragnarsson, betur þekktur sem Guðni Þórsari, liðstjóri og alt mulig mand Þórs, gengur hér um svæðið og sér til þess að allt sé á hreinu. Hann klikkar ekki frekar en fyrri daginn!

Nokkrir leikmenn ÍR eru komnir út að skoða völlinn sem lítur vel út, allavega úr fjarska. Dómaratríóið er einnig að rölta um og skoða aðstæður.

Eins og allir vita er auðvitað alltaf gott veður hérna fyrir norðan. Sólin hefur leikið við hvern sinn fingur í dag en er þó komin á bakvið ský núna. Engu að síður er þokkalega hlýtt og engin úrkoma.

Þórsarar voru án nokkurra lykilleikmanna í jafnteflinu gegn Fram í síðustu umferð. Nacho var í banni og Orri Sigurjónsson og Jónas Björgvin meiddir. Nacho verður væntanlega í byrjunarliðinu í dag en ólíklegt er að Jónas og Orri verði með.

Þórsarar hafa verið mjög flottir í sumar. Fáir bjuggust við því að þeir yrðu í svona harðri toppbaráttu á þessum tíma en þeir hafa spilað flottan fótbolta í bland við sína landsþekktu baráttu.

ÍR-ingar hafa verið á fínu skriði uppá síðkastið. Þeir hafa unnið þrjá af síðustu fimm leikjum sínum en þeir unnu einungis einn af fyrstu sjö leikjum sínum í sumar.

Spánverjarnir tveir í liði Þórs, Alvaro Montejo og Nacho Gil hafa vakið verðskuldaða athygli í sumar. Alvaro er kominn með 10 deildarmörk en þeir hafa náð gríðarlega vel saman og Þórsliðið spilað hálfgerðan Samba fótbolta oft á tíðum.

Í fyrri umferðinni fór leikur liðanna 0-1 fyrir Þór, en Alvaro Montejo skoraði eina mark leiksins.

Þegar þessi lið mættust í fyrra endaði leikurinn í fyrri umferðinni með ótrúlegum sigri ÍR. Þórsarar komust þá yfir á 86. mínútu en ÍR-ingar skoruðu tvö mörk í uppbótartíma og hirtu stigin þrjú.

Í seinni umferðinni lauk leik liðanna með markalausu jafntefli. Við vonum svo sannarlega að það verði ekki niðurstaðan í dag!

Dómarakvartettinn í dag er að norðan. Bjarni Hrannar Héðinsson mun halda á flautunni og honum til aðstoðar verða þeir Ásgeir Þór Ásgeirsson og Steinar Gauti Þórarinsson. Eftirlitsmaður er svo enginn annar en Bragi Bergmann.

Þórsarar gerðu öllu minni breytingar á leikmannahópi sínum. Héldu öllum og bættu við sig Jóhanni Helga Hannessyni sem kom aftur heim eftir mislukkaða dvöl hjá Grindavík.

Talsverðar breytingar urðu á liði ÍR í glugganum. Þeir misstu m.a. Óskar Jónsson, Andra Þór Magnússon, Mána Austmann Hilmarsson og Nile Alexander Walwyn.

Í staðinn komu m.a. Ágúst Freyr Hallsson, Jesus Suarez Guerrero og Skúli E. Kristjánsson Sigurz, en sá síðastnefndi kom á láni frá Breiðabliki.

Með sigri í dag fara Þórsarar upp fyrir Víking Ólafsvík og jafnvel HK líka, fari svo að Lið fólksins úr Kópavogi tapi fyrir Leikni.

ÍR-ingar geta slitið sig frá fallbaráttunni með sigri, en eiga einnig hættu á að missa tvö lið upp fyrir sig ef þeir tapa, svo galopið er þetta.

Í síðustu umferð heimsóttu Þórsarar þjóðarleikvanginn og spiluðu þar við Fram. Markahæsti leikmaður deildarinnar, Guðmundur Magnússon skoraði þrennu í þeim leik og sá til þess að Þórsarar fóru einungis heim með eitt stig.

ÍR-ingar unnu gríðarlega sterkan 1-0 sigur á nágrönnum sínum í Breiðholtinu og hafa því montréttinn núna. Fóru meira að segja upp fyrir Leikni með sigrinum og eru komnir í betri mál í fallbaráttunni.

Spennan í deildinni er í raun ótrúleg á báðum endum töflunnar.

ÍA, HK, Víkingur og Þór eru í harðri baráttu um sæti í Pepsi deildinni að ári og sex lið eru ekki laus úr fallbaráttunni.

Það má kannski segja að Þróttur og Fram séu einu liðin sem eru ekki í harðri baráttu eins og er, en skjótt skipast veður í lofti svo þau gætu verið mætt í baráttuna uppi eða niðri áður en við vitum af.

Leikurinn er partur af 16.umferð deildarinnar, en hún hófst í gær en þá sóttu Selfyssingar stig í Ólafsvík. Frábær úrslit fyrir Selfoss en Víkingar væntanlega ekki sáttir.

Góðan og margblessaðan daginn! Verið velkomin í beina textalýsingu frá leik Þórs og ÍR í Inkasso deild karla.