Akureyringurinn Þóroddur Hjaltalín dæmir leikinn. Þóroddur var valinn besti dómari umferða 1-11 í deildinni. Birkir Sigurðarson og Bryngeir Valdimarsson eru aðstoðardómarar og Aðalbjörn Heiðar Þorsteinsson er með skiltið.

Spámaður umferðarinnar er Hólmbert Aron Friðjónsson: "Stál í stál, held að það verði ekki mörg mörk skoruð og tippa ég á 1-1."

Breiðablik gerir eina breytingu á liði sínu frá sigrinum á Víkingi Ólafsvík í Mjólkurbikarnum þar sem þeir unnu í vítaspyrnukeppni og eru komnir í úrslitaleikinn. Oliver Sigurjónsson er kominn aftur eftir meiðsli og byrjar inná í stað Willums Þórs Willumssonar sem er ekki í leikmannahópnum í dag eftir að hafa farið meiddur útaf í leiknum gegn Víkingi Ólafsvík.

Valur datt út á svekkjandi hátt gegn Sheriff í undankeppni Evrópudeildarinnar á útivallarmörkum á fimmtudaginn. Þeir gera enga breytingu á sínu byrjunarliði í kvöld. Andri Adolphsson heldur Sigurði Agli Lárussyni áfram á bekknum.

Nokkrir fróðlegir molar sem koma fram á blikar.is:
-Fyrsti mótsleikur liðana var í bikarkeppni KSÍ þann 13.ágúst 1965
-Liðin hafa mæst 89 sinnum þar sem Valur hafa unnið 38 sinnum, Blikar 32 sinnum og 19 jafntefli.
-Blikar hafa unnið 6 leiki, Valur 3 og 3 jafntefli á Kópavogsvelli síðan Blikar fóru upp síðast árið 2005

Breiðablik er með mjög góða upphitun á síðu sinni, blikar.is þar sem er fullt af fróðleiksmolum um leiki þessa liða í gegnum tíðina. Frábært framtak hjá þeim og gaman að sjá þessi vinnubrögð hjá markaðsdeild Blika.

Þegar liðin mættust í fyrri umferðinni á Origo-vellinum komust Blikar yfir en Ólafur Karl Finsen skoraði sigurmark Vals í blálokin og Valur vann 2-1 sigur í háspennuleik.

Þetta er sannkallaður toppslagur þar sem Breiðablik eru efstir með 34 stig og Valur í 3.sæti með 32 stig en eiga þó leik til góða. Stjarnan missteig sig í gær þegar þeir gerðu 2-2 jafntefli við Grindavík svo þetta er dauðafæri til að styrkja stöðuna á toppnum fyrif liðið sem vinnur í kvöld.

Góða kvöldið og verið velkomin í beina textalýsingu frá leik Breiðabliks og Vals í Pepsí-deild karla.