Byrjunarliðin eru kominn inn og KA gerir eina breytingu frá jafnteflinu við Stjörnuna á miðvikudaginn, Hallgrímur Jónasson er búinn að taka út leikbann og byrjar í dag í stað Alexander Trninic sem fór meiddur útaf gegn Stjörnunni.

Grindavík gerir þrjár breytingar frá tapinu gegn Fjölni í síðustu umferð. Alexander Veigar Þórarinsson, Matthías Örn Friðriksson og Sito koma inn í byrjunarliðið í stað Brynjars Ásgeirs, Björn Berg Bryde og René Joensen.

Bæði þessi lið eru að skipta um þjálfara eftir tímabilið þar sem Túfa er að kveðja KA menn eftir að hafa verið hjá klúbbnum síðan árið 2006. Óli Stefán hefur þjálfað Grindavík síðustu 3 tímabil og ætlar sér að prófa nýja hluti í haust. Spurning hvort þeir skipti bara um hlutverk, maður veit aldrei!

KA eru að koma úr leikjum við tvö bestu lið deildarinnar, Stjörnuna og Val þar sem þeir náðu í 2 góð stig og eru í 6.sætinu með 25 stig. Grindavík er í 7.sæti með jafn mörg stig en hafa aðeins fengið 2 stig úr síðustu 5 leikjum. Vinni KA í dag er 6.sætið svo gott sem öruggt þar sem þeir eru með töluvert betri markatölu.

Góðan daginn og verið hjartanlega velkomin í beina textalýsingu frá Greifa-velli þar sem KA fær Grindavík í heimsókn í næst síðustu umferð Pepsí-deildar karla.