Það má búast við erfiðum leik fyrir textalýsanda kvöldsins. Enda kuldinn rosalegur og fingur mínir þegar farnir að fá að finna fyrir honum! En maður fórnar sér í þetta. Allt fyrir lesendur.

Það er slatti af krökkum úr yngri flokkum KAS Eupen hér rétt hjá mér í stúkunni. Þeir hvetja Katar í kvöld sem er kannski skiljanlegt. Enda eiga Katarar félagið þeirra.

Það er búið að stilla fánunum upp á vellinum og styttist í leik.

Reynslumikill Hollendingur með flautuna í kvöld. Hann heitir Pol van Boekel og er 43 ára Hollendingur sem hefur verið FIFA-dómari í tíu ár. Allt dómarateymið er hollenskt.

Verið með í umræðunni um landsliðið með því að nota kassamerkið #Fotboltinet um leik Katar og Íslands! 🇶🇦 🇮🇸 pic.twitter.com/5KvwTFBwff

— Fotbolti.net (@Fotboltinet) November 19, 2018

Guðlaugur Victor Pálsson var ekki í leikmannaúlpu þegar menn tóku göngutúr um völlinn áðan og líklegt að hann komi ekkert við sögu í kvöld. Hann er nýstiginn upp úr meiðslum.

Eggert Gunnþór er að fara að spila sinn fyrsta landsleik síðan árið 2012! Það eru fjögur ár síðan hann var síðast í hóp. Ég spjallaði við Eggert á dögunum en með því að smella hér má horfa á það viðtal.

Byrjunarlið Íslands er mætt.

Rúnar Alex Rúnarsson er í markinu. Hörður Björgvin spilar nú í þriggja manna miðvarðarlínunni með Kára fyrirliða og Sverri Inga.

Ari Freyr Skúlason og Rúrik Gíslason eru vængbakverðir. Á miðjunni eru Arnór Ingvi Traustason og Eggert Gunnþór Jónsson.

Samkvæmt leikskýrslu er Arnór Sigurðsson í holunni og þeir Albert Guðmundsson og Kolbeinn Sigþórsson frammi. Já Kolli fær tækifæri í byrjunarliðinu, fróðlegt að sjá hvernig það kemur út.

Það er kalt í Eupen og um tveggja gráðu hiti nú þegar styttist í leikinn. Leikflöturinn sjálfur er ansi lítill og þurfa innköstin ekki að vera mjög löng til að koma knettinum inn í teiginn! Við erum mættir á völlinn og bíðum nú bara eftir því að fá upplýsingar um byrjunarlið okkar manna.

Létt snjókoma í aðdraganda leiks Katar og Íslands #fotboltinet pic.twitter.com/jiEUymNkTM

— Elvar Geir Magnússon (@elvargeir) November 19, 2018

Kári Árnason, fyrirliði Íslands í leiknum:
Auðvitað erum við að hugsa mikið um að ná sigri. En við erum líka að prófa nýtt kerfi sem við erum að reyna að fínpússa. Það er mikilvægt að hlutirnir séu rétt gerðir. Vonandi sköpum við nóg af færum til að skora. Við höfum ekki unnið í langan tíma og það er mikilvægt upp á sjálfstraustið að ná sigri. Þessir Katarar eru samt engin lömb að leika sér við.

Fróðlegt verður að sjá hvernig byrjunarlið Íslands verður. Jón Guðni Fjóluson fór heim til Rússlands í gær vegna veikinda í fjölskyldu hans og spilar ekki. Alfreð Finnbogason hefur einnig yfirgefið hópinn og Aron Einar Gunnarsson mun ekki spila.


Við lékum okkur að því í dag að setja saman mögulegt byrjunarlið í leiknum en Hamren hefur gefið út að sama leikkerfi verði notað og gegn Belgum.

Velkomin í þessa textalýsingu!

Ísland leikur sinn síðasta landsleik á árinu. Leikinn verður vináttulandsleikur gegn Katar en hann fer fram í Eupen, afar rólegum bæ hér í Belgíu. Vonandi mun Ísland vinna afar langþráðan sigur í þessum leik hér í kvöld!

Katar hefur verið á fínu skriði, unnið fjóra af fimm síðustu leikjum sínum. Í síðustu viku vannst áhugaverður sigur gegn Sviss 1-0. Þetta er lið í mikilli þróun.