KR-ingar heiðra tvo leikmenn fyrir leik. Betsy Hasset er nýkomin heim af HM og fær hér blómvönd. Rétt eins og Hugrún Lilja sem er heiðruð fyrir að hafa spilað 100 leiki fyrir félagið.

Það er allt orðið klárt í Vesturbænum. Byrjunarliðin eru klár og eins og má sjá stillir KR upp sínu sterkasta. Hjá Tindastól vekur athygli að markaskorarinn Vigdís Edda er á bekknum.

Jóhann Kristinn Gunnarsson er sérfræðingur Fótbolta.net og spáir markaleik:

"Það er einhver meðbyr með KR-ingum þessa dagana og greinilegur stígandi í leik liðsins. Spilamennska liðsins á Akureyri í síðustu umferð gegn Þór/KA lofaði mjög góðu fyrir framhaldið hjá þeim. Hikuðu aldrei við að pressa stíft og uppskáru stig, sem var síst of mikið fyrir frammistöðuna í þeim leik. Katrín Ómars og Gumma að leiða sóknarleik er aldrei góð frétt fyrir andstæðingana. Þær finna lykt af netinu eins og blóðhundar og búa yfir gæðum til að komast að því með boltann meðferðis. Tindastóll þarf að eiga toppleik varnarlega til að halda þeim í skefjum."

"Tindastóll er auðvitað deild neðar og daðrar þar við toppbaráttuna. Það er vel gert af nýliðum í deildinni. Í bikarkeppninni gætu þær því verið ólíkindatól og aldrei skyldi afskrifa þær fyrirfram. Þær hafa markamaskínu í liðinu sem getur strítt öllum varnarmönnum á landinu, Murielle Tiernan. KR liðið þarf klárlega að hafa góðar gætur á henni."

"KR liðið kemur greinilega langoftast vel undirbúið til leiks og skorar snemma á móti sterkum liðum. Tindastóll þarf að hafa það í huga ef ekki á illa að fara."

"Gæti orðið svolítið varnarsinnaður leikur framan af og svo opnast flóðgáttir. 5-2 fyrir KR."

KR-ingar komu inn í keppnina í 3. umferð og slógu Keflvíkinga út í 16-liða úrslitum með 1-0 sigri. Selfyssingurinn Guðmunda Brynja Óladóttir skoraði mark KR í leiknum.

Tindastóll er aftur á móti á leið í sinni þriðja bikarleik. Liðið byrjaði á að valta yfir Hamrana, 8-1, í leik þar sem þær Murielle Tiernan og Vigdís Edda Friðriksdóttir skoruðu báðar þrennu og María Dögg Jóhannesdóttir og Jacqueline Altschuld gerðu sitthvort markið.

Næst mættu þær liði Augnabliks og tókst að vinna 2-1 sigur. Þar var Vigdís Edda áfram á skotskónum og kom Tindastól yfir. Augnablik náði svo að jafna áður en fyrirliðinn Bryndís Rut Haraldsdóttir skallaði Stólana áfram í 8-liða úrslitin.

Vigdís Edda, með fjögur mörk, er markahæst þeirra leikmanna sem enn eru eftir í bikarnum. Þarf að skora eitt til að komast í fimm mörk eins og þær Regielly Oliveira Rodrigues úr Haukum, Hafrún Rakel Halldórsdóttir úr Aftureldingu og Lauren Wade úr Þrótti.

Liðin leika í sitthvorri deildinni. KR-ingar hafa verið í brasi í Pepsi Max og sitja þar í neðsta sæti með 4 stig. Tindastóll hefur hinsvegar komið af miklum krafti til leiks í Inkasso-deildina en nýliðarnir eru þar í 4. sæti.

Þar hafa þær verið duglegar að skora mörk og strítt liðunum sem fyrirfram hafa verið stimpluð sterkari. Það er því alls ekkert útilokað að Stólarnir nái að hrella KR-inga hér á eftir.

Góðan dag og verið velkomin í beina textalýsingu frá leik KR og Tindastóls í 8-liða úrslitum Mjólkurbikarsins!

Þetta er fyrsta viðureignin í 8-liða úrslitum en kl.19:15 mætast ÍA og Fylkir á Skaganum. Á morgun fara svo seinni tveir leikirnir fram. Selfoss tekur á móti HK/Víking og Þór/KA fær Valskonur í heimsókn.

Hörkuleikir framundan og mikil spenna!