Rúmlega 5 mínútur í leik og liðin að gera sig klár í að ganga til vallar. Vonandi að við fáum fjörugan leik og skemmtilegan.

Grindavík gerir eina breytingu á liðinu frá því í jafnteflinu við Breiðablik fyrir tæpri viku. Marinó Axel Helgason tekur út leikbann og kemur Sigurjón Rúnarsson inn í liðið í hans stað í varnarlínuna sem hefur fengið fæst mörk allra á sig í sumar.

Eyjamenn gera þó nokkrar breytingar á liði sínu frá tapinu gegn Fylki. Priestly David, Sindri Snær Mágnússon, Jonathan Glenn, Rafael Veloso, Jonathan Franks og Diogo Manuel Goncalves Coelho fara út fyrir Sindra Björnsson, Breka Ómarsson, Róbert Aron Eysteinsson, Víðir Þorvarðarson, Halldór Pál Geirsson og Sigurður Arnar Magnússon.

Gunnar Þorsteinsson fyrirliði Grindavíkur á 65 leiki með ÍBV í deild og bikar en hann lék með liðinu 3 tímabil frá 2013-2015.

Liðin hafa mæst alls 37 sinnum í efstu deild frá upphafi og er tölfræðin á bandi Eyjamanna þegar horft er á sigurleiki en þeir hafa unnið 20 sinnum, aðeins 5 leikjum hefur lokið með jafntefli og Grindavík sigrað 12.

Markatalan er 62-42 gestunum frá eyjunni fögru í vil.

Fyrsti leikur liðanna í efstu deild fór fram á Grindavíkurvelli í Sjóvá Almennra deildinni árið 1995. Þeim leik lauk með 1-0 sigri Grindavíkur en mark þeirra skoraði Milan Stefán Jankovic sem flestir ættu að kannast við.

Sérstakir áhugamenn um varnarfærslur skemmta sér konunglega á leikjum Grindavíkur og hefur verið hent í viðurnefnið Atletico Madrid Íslands.

Aðrir sem vilja mörk og action hafa fengið lítið fyrir peninginn hjá Grindavík í sumar og eru sumir á því að Grindavík sé hreinlega leiðinlegasta lið landsins. Ég læt kyrrt liggja að dæma um það en þó er ljóst að liðið þarf að fara að gera eitthvað sóknarlega. Ekki er öll von þó úti en fjörugasti leikur Grindvíkinga í sumar kom einmitt í fyrri leiknum gegn ÍBV á Hásteinsvelli þar sem hvorki fleiri né færri en 4 mörk voru skoruð í 2-2 jafntefli liðanna.

Heimamenn í Grindavík eru í ögn betri málum en þeir sitja í 9.sæti deildarinnar með 14 stig.

Vörn liðins verður vart kennt um stöðu liðsins sem aðeins hefur fengið á sig 10 mörk í deildinni í sumar. En eins frábær og vörnin hefur verið má sömuleiðis færa rök fyrir því að sóknarleikur liðsins hafi verið ansi slakur eins og aðeins 8 mörk skoruð bera vitni um.

Það má til sanns vegar færa að bæði lið séu í brasi og að berjast fyrir lífi sínu í deildinni.

Eyjamenn sitja á botni deildarinnar með aðeins 5 stig hafandi tapað síðustu 6 leikjum sínum,markatalan 10-32, búið að skipta um þjálfara og útlitið langt því frá að vera bjart fyrir Eyjamenn.

Góðan dag kæru lesendur og verið hjartanlega velkomin í beina textalýsingu frá leik Grindavíkur og ÍBV í Pepsi Max deild karla.