Jæja þetta fer að detta inn. Smá netvesen á mér hér í blaðamannaboxinu en það er allt komið í lag. Ekki seinna að vænna enda aðeins um 5 mínútur í leik.

Byrjunarliðin eru komin inn bæði lið breyta á milli leikja.

Hjá HK fara þeir Hörður Árnason og Ásgeir Marteinsson út fyrir Björn Berg Bryde sem snýr aftur á sinn gamla heimavöll og Atla Arnarsson. Vekur líka athygli að Viktor Bjarki aðstoðarþjálfari HK er á meðal varamanna. Sé ekki fyrir mér að hann komi inná en hann kann svo sannarlega fótbolta kauði.

Grindavík gerir tvær breytingar á liði sínu frá tapinu gegn Fylki Rodrigo Gomes Mateo og Sigurður Bjartur Hallsson fara út fyrir Hermann Ágúst Björnsson og Stefán Ljubicic. Varamannabekkur Grindavíkur telur svo aðeins 6 en heimilt er að hafa 7 varamann. Engin Alexander Veigar í hóp þar.

Fyrir liggur að Hörður Árnason verður ekki með HK í dag en hann er staddur erlendis í brúðkaupi bróður síns.

Fótbolti.net sendir fjölskyldunni að sjálfsögðu hamingjuóskir.

Björn Berg Bryde mætir á sinn gamla heimavöll í dag en hann á 126 leiki í deild og bikar með Grindavík en söðlaði um fyrir tímabilið og gekk til liðs við Stjörnuna sem síðar lánaði hann til HK þar sem hann hefur heldur betur blómstrað.

Liðin hafa aðeins mæst þrisvar í efstu deild frá upphafi.

Grindavík vann sigur í fyrri leik liðanna sumarið 2008 á Kópavogsvelli 0-2 en síðari leik liðanna í Grindavík lauk með 2-2 jafntefli.

Fyrri leik liðanna í sumar lauk með markalausu jafntefli í líklega einum leiðinlegasta fótboltaleik sumarsins.

En eins sáttir og gestirnir úr Kópavogi geta verið með tímabilið fram að þessu hringja viðvörunarbjöllur í Grindavík.

Þrátt fyrir það að vera með eina bestu vörn deildarinnar hefur Grindavíkurliðinu gengið bölvanlega að vinna sigra í sumar. 3 sigrar í 16 leikjum, 18 mörk fengin á sig en aðeins 13 mörk skoruð og 11.sæti á þessum tímapunkti lítur alls ekki vel út.

Augljóst er að markaskorun er hausverkur Grindavíkur en Primo sem kom í sumarglugganum hefur skorað 3 mörk í 6 leikjum og er líklega sá sem Grindvíkingar horfa til á þeim vígstöðvum.

HK er án nokkurs efa spútniklið deildarinnar þetta sumarið. Brynjar Björn og Viktor Bjarki hafa byggt upp frábært lið í Kórnum þetta sumarið og Evrópukeppni líklegur áfangastaður HK ef áfram heldur sem horfir.

Liðið sem fór tiltölulega hægt af stað en heldur betur spýtt í eftir því sem liðið hefur á sumarið. Liðið tapaði síðast gegn Val þann 30. Júní og hefur unnið 4 af síðustu 5 leikjum sínum og situr í 4.sæti deildarinnar.

Það hefur verið einstaklega gaman að sjá liðsheildina sem er sterk hjá liði HK ásamt því að hafa auðvitað frábæra fótboltamenn á sínum snærum.

Komið þið sæl kæru lesendur og verið hjartanlega velkomin í beina textalýsingu Fótbolta.net frá leik Grindavíkur og HK í Pepsi Max deildinni.