Hér er verið að veita allskonar viðurkenningar. KR-ingar heiðra hér Davíð Þór Viðarsson, fyrirliða FH, en hann hefur ákveðið að leggja skóna á hilluna eftir þetta tímabil.
Þá fær Skúli Jón Friðgeirsson, leikmaður KR, einnig viðurkenningu en þetta er hans síðasti heimaleikur fyrir KR þar sem að hann ætlar einnig að hætta eftir þetta tímabil.

Þá ganga liðin inná völlinn. FH-ingar standa heiðursvörð fyrir KR-inganna sem að verður nú að teljast virðingavert. Prik á Hafnfirðinganna fyrir þetta. Hinum meginn á vellinum standa nokkrir útvaldir KR-ingar og halda á blysum. Þá er búið að kveikja í einni tertu. Geggjuð umgjörð hjá Íslandsmeisturunum.

Það rignir aðeins hér í Vesturbænum sem að er bara flott. Fólk sem að ætlar sér að mæta ætti að koma vel klætt. Alltaf hægt að fara úr jakkanum bara ef þess þarf.

FH-ingar gera þrjár breytingar á liði sínu frá síðasta leik þegar að þeir unnu ÍBV 6-4 í sennilega ruglaðasta leik sumarsins. Kristinn Steindórsson, Guðmann Þórisson og Þórður Þorsteinn Þórðarsson koma út og inn í þeirra stað koma þeir Brandur Olsen, Guðmundur Kristjánsson og Cedric D'Ulivo.

Byrjunarliðin eru nú klár. KR-ingar gera engar breytingar á liði sínu frá síðasta leik, þegar að þeir tryggðu sér Íslandsmeistaratitilinn gegn Val.

Næstsíðasta umferð Pepsi Max-deildar karla fer öll fram á sama tíma og er möguleiki á að úrslit ráðast allstaðar þar sem að skiptir máli. Það er eitt Evrópusæti eftir og eins og fyrr segir er FH í bílstjórasætinu að ná því. Vinni þeir í dag er þetta komið hjá þeim. Geri þeir jafntefli þurfa þeir að treysta á að Stjarnan vinni ekki Fylki í dag. Tapi þeir leiknum þurfa þeir að treysta á að Fylkir og Stjarnan geri jafntefli. Ég held að þetta sé rétt reiknað hjá mér.

Þessi lið hafa fyrir þennan leik tvisvar mæst í sumar. KR-ingar unnu fyrri leik þessara liða í deildinni 2-1 þar sem að Alex Freyr Hilmarsson og Tobias Thomsen skoruðu mörk Vesturbæjinga. Steven Lennon skoraði fyrir FH.

Þá áttust þessi lið við í undanúrslitum Mjólkurbikarsins í Kaplakrika þar sem að FH hafði betur, 3-1. Steven Lennon, Brandur Olsen og Morten Beck Guldsmed skoruðu mörk FH og Finnur Tómas Pálmason skoraði fyrir KR.
FH tapaði úrslitaleiknum gegn Víking og þurfa því að tryggja sér inní Evrópu í gegnum deildarkeppnina.

KR-ingar tryggðu sér Íslandsmeistaratitilinn með sigri á Val í síðustu umferð og munu taka við bikarnum eftir leikinn í dag. FH-ingar eru í bílstjórasætinu um Evrópusæti og geta tryggt sér endanlega í dag með sigri. KR-ingar munu hins vegar pottþétt ekki gefa neitt eftir og munu láta FH hafa fyrir þessu í dag.

Komiði margblessuð og sæl kæru lesendur og veriði hjartanlega velkomin í þessa beinu textalýsingu á leik KR og FH í næstsíðustu umferð Pepsi Max-deildar karla.