Allskonar hyllingar hér í upphafi leiks. Viktor Örn, Gulli og Damir fá allir hér blóm fyrir þeirra framlag til íslenska boltans. Damir spilar sinn 200. leik fyrir Breiðablik í dag og óskum við honum til hamingju með það.

Þá ganga liðin inná völlinn. Blikar standa heiðursvörð og "Við erum KR" með Bubba Morthens spilað í græjunum. Virðingavert hjá Blikunum.

Thomas Mikkelsen, framherji Breiðabliks, er í harðri baráttu um markakóngstitilinn og mun hann því mjög líklega láta mikið fyrir sér fara í dag. Hann er með 12 mörk í deildinni líkt og Gary Martin, framherji ÍBV. Hilmar Árni Halldórsson, leikmaður Stjörnunnar, er hins vegar markahæstur sem stendur með 13 mörk. Takist Mikkelsen að skora í dag á meðan að Gary Martin og Hilmari Árna mistekst það verður Daninn markakóngur í ár vegna fjölda spilaðra leikja.

Þá eru byrjunarliðin klár. Ágúst Gylfason gerir eina breytingu á liði sínu frá síðasta leik Blika gegn ÍBV. Gísli Eyjólfsson kemur út og inn í hans stað kemur Viktor Karl Einarsson.

KR-ingar gera eina breytingu á liði sínu frá síðasta leik gegn FH. Skúli Jón Friðgeirsson er í leikbanni og hefur því spilað sinn síðasta leik fyrir KR en hann ætlar að leggja skóna á hilluna eftir tímabilið. Inn í hans stað kemur Arnþór Ingi Kristinsson.

Blikar vilja hins vegar pottþétt ekki missa KR svona langt frammúr sér og geta minnkað forskotið niður í 8 stig. Þá er þetta einnig síðasti leikur Ágústs Gylfasonar við stjórnvölinn hjá Breiðablik en honum var sagt upp í vikunni. Gústi vill væntanlega sanna sig í dag með því að vinna Íslandsmeistaranna fyrir verðandi vinnuveitendur sína, hverjir sem að það nú verða.

Þrátt fyrir að leikurinn í dag skipti þannig séð engu máli þá er ekki þar með sagt að það sé ekkert undir. KR-ingar vilja væntanlega klára mótið með stæl. Vinni þeir í dag klára þeir mótið með 14 stigum meira en Breiðablik og jafna stigametið sem að sett hefur verið í efstu deild á Íslandi. Þetta met settu þeir sjálfir árið 2013 þegar að þeir fengu 52 stig, en Stjarnan jafnaði metið árið eftir.

Hér er um að ræða leik tveggja efstu liðanna og sama hvað gerist í dag mun þeim ekki vera haggað úr sínum sætum. KR-ingar tóku við Íslandsmeistara bikarnum eftir síðasta leik gegn FH á Meistaravöllum á meðan að Breiðablik situr sem fastast í öðru sæti.

Jú komiði sæl og blessuð og veriði hjartanlega velkomin í þessa beinu textalýsingu á leik Breiðabliks og KR í lokaumferð Pepsi Max-deildar karla.