Liðin mætt til vallar þetta er að bresta á.

Það er eins og kom fram í frétt hér á Fótbolti.net fyrr í kvöld uppselt á leikinn og nokkuð þétt setið hér í stúkunni.

Vallarþulurinn hefur hafið upp raust sína og er að kynna liðin til leiks. Þetta er alveg að bresta á svo byrjum þetta partý.

Brynjólfur Andersen skartar svaðalegri hárgreiðslu í kvöld. Vona að Hafliði Breiðfjörð nái frábærri mynd af henni í kvöld. Litað grænt í hliðum með númerið 45 skrifað í.

Ég get ekki annað en hrósað þessum ágæta hópi Seltirninga sem er mættur í gömlu stúkuna hér á Kópavogsvelli. Mættir með stóra fána og eru klárir í slaginn. Eflaust fengið sér smá söngvatn til að mýkja raddböndin fyrir kvöldið.

Byrjunarliðin eru mætt í hús og svo sem fátt sem kemur á óvart í þeim. Guðjón Pétur Lýðsson og Kwame Quee sem hafa staðið sig með ágætum í æfingarleikjum síðustu vikna eru á bekknum en það telst þó varla til óvæntra tíðinda enda Blikaliðið firnasterkt og með góða breidd.

Hjá gestunum í Gróttu er fátt óvænt en þó þykir mér tíðindi að Gabríel Fannar Eyjólfsson byrjar fyrir þá en ég sá það ekki fyrir.

Fyrri viðureignir

Liðin hafa mæst alls 5 sinnum í opinberum leikjum á vegum KSÍ. 3 í Deildarbikar og 2 í Bikarkeppninni. Skemmst er frá því að segja að Blikar hafa unnið þá alla nokkuð sannfærandi og er markatalan 18-1 Blikum í vil.

Leikurinn verður þó ekki spilaður á tölfræðinni einni saman og nýliðar hafa komið á óvart á Kópavogsvelli áður. En þar fyrir utan gjörþekkja þjálfarar beggja liða andstæðing sinn í dag og er óhætt að búast við hörkuleik.

3.Sæti Breiðablik

Blikar hafa endað í 2.sæti deildarinnar síðustu tvö tímabil og með nýjum þjálfara og breyttum áherslum er eflaust krafa um að bæta þann árangur þegar upp úr hattinum verður talið í haust.
Hráefnin í meistaralið eru í það minnsta til staðar hvað varðar gæði á vellinum.

11.sæti Grótta

Gróttumenn gerðu sér lítið fyrir og enduðu í efsta sæti Inkasso deildarinnar sálugu sem nýliðar á siðasta tímabili. Liðið lék þar skemmtilegan fótbolta undir stjórn Óskars Hrafns Þorvaldssonar sem eins og frægt er orðið söðlaði um að loknu síðasta tímabili og tók við liðið Breiðabliks. Við liði Gróttu tók svo Ágúst Gylfason sem þjálfaði jú auðvitað Breiðablik á síðustu leiktíð.

Innan raða Gróttu eru margir virkilega spennandi leikmenn sem verður gaman að sjá hvort að þeir höndli Pepsi Max deildina.

En frekari upplýingar um Gróttu ásamt greiningu Fótbolta.net á liði þeirra má finna í hlekknum efst í þessu boxi.

Það er ekki úr vegi að kynnast liðunum sem mætast hér í kvöld og hvernig sérfræðingar Fótbolta.net spá sumrinu fyrir þeim og við skulum hefja þá yfirferð á gestaliðinu nýliðum Gróttu frá Seltjarnarnesi.

Leikurinn er eins og flestum ef ekki öllu er ljóst liður í fyrstu umferð Pepsi Max deildar karla sem fór loks af stað þessa helgina vegna hluta sem við ætlum ekkert að vera að rifja neitt sérstaklega upp. En þetta er loksins hafið og við getum leyft okkur að hlakka til vonandi frábærs knattspyrnusumars.

Góða kvöldið kæru lesendur og verið velkomin til leiks í leik Breiðabliks og Gróttu í Pepsi Max deildinni.