Byrjunarliðin eru klár og þau má sjá hér til hliðar. Skagamenn gera ekki neina breytingu frá síðasta leik enda engin ástæða til eftir sigurinn á Val.

En Brynjar Björn Gunnarsson þjálfari HK gerir hins vegar þrjár breytingar í sínu liði. Út fara þeir Ásgeir Marteinsson, Alexander Freyr Sindrason og Stefán Alexander Ljubicic. Inn koma þeir Bjarni Gunnarsson, Leifur Andri Leifsson og Valgeir Valgeirsson.

Dómari dagsins er Pétur Guðmundsson og honum til aðstoðar verða þeir Oddur Helgi Guðmundsson og Andri Vigfússon. Varadómari er Helgi Mikael Jónasson og eftirlitsmaður KSÍ er Jón Sigurjónsson

Síðasta umferð var heldur betur fjörug hjá báðum liðum. Skagamenn gerðu sér lítið fyrir og skelltu Valsmönnum 1-4 á Origo-vellinum á meðan HK gerði 4-4 jafntefli við Gróttu í frábærum leik á Vivaldi-vellinum. Það er bara vonandi að liðin verði í jafn miklu stuði í dag og bjóði okkur uppá fullt af mörkum.

Það má segja að bæði lið hafi farið ágætlega af stað á þessu Íslandsmóti. Skagamenn sitja í fjórða sæti með 6 stig meðan HK er í níundas sæti með 4 stig og eing og glöggir lesendur eru nú þegar búnir að fatta þá fara HK menn upp fyrir ÍA með sigri.

Heilir og sælir kæru lesendur og verið hjartanlega velkomin í beina textalýsingu frá Norðurálsvellinum á Akranesi þar sem heimamen í ÍA taka á móti HK.