Jess. Liðin eru komin út á völl og þetta er að skella á. Mikið samgleðst ég heimakonum að komast loksins í bolta eftir allt sem á undan hefur gengið.

Það er langur fótboltadagur hjá Þórunni Helgu, Bryndísi Rut, Hallgerði og eflaust fleirum en þær voru að þjálfa á Símamótinu í allan dag. Hafa vonandi náð að setjast aðeins niður á milli atriða.

Það er örstutt í þetta og byrjunarliðin klár eins og sjá má hér til hliðar. Þar er ekkert óvænt. Bæði lið vinna áfram með svipaðar pælingar og í síðustu deildarleikjum.

Liðin drógust einnig saman í bikarnum í fyrra og mættust á Meistaravöllum þann 28. júní 2019.

Þá varð úr hörkuleikur sem KR-ingar unnu 1-0 með marki frá Betsy Hassett sem nú leikur með Stjörnunni.

Þáverandi markvörður Tindastóls, Lauren Amie Allen, átti þá algjöran toppleik, en hún hefur nú fært sig yfir á Akureyri og spilar með Þór/KA. Amber Kristin Michel er komin í markið hjá Stólunum og mikilvægt að hún standi vaktina vel hér á eftir.

Þetta er áhugaverður leikur fyrir margar sakir. Liðin leika í sitthvorri deildinni. KR í Pepsi Max og Tindastóll í Lengjudeildinni.

KR eru stigalausar á botni efstu deildar en Tindastóll í 2. sæti í Lengjunni og því í raun aðeins lið Keflavíkur á milli þeirra ef við horfum á heildar stöðutöflu allra deilda.

Áhugaverðara er að KR-ingar eru nýlausar úr sóttkví og klæjar rækilega í tærnar að sækja fyrsta sigur sumarsins eftir erfiða byrjun.

Á meðan KR var í kví spilaði Tindastóll þrjá leiki og undirbúningur liðanna hefur því verið töluvert ólíkur.

Heil og sæl!

Hér verður boðið upp á beina textalýsingu frá viðureign KR og Tindastóls í 16-liða úrslitum Mjólkurbikarsins.