Liðin eru komin út á iðagrænan og vel vökvaðan Kópavogsvöllinn.

2 mínútur í kick off og Herra Hnetusmjör sér um lokapeppið.

Það er aldeilis kominn í fiðringur í magann á undirritaðri. Örstutt í leik. Fólk farið að streyma á Kópavogsvöllinn og ekkert annað skrifað í skýin en að við fáum frábæra skemmtun hér í kvöld.

Fanndís Friðriksdóttir er áfram fjarri góðu gamni í liði gestanna. Athygli vekur að bæði Bryndís og Aldís eru á varamannabekk Vals en þær eru báðar markverðir. Katla Tryggvadóttir er svo fædd árið 2005, efnileg. Þær Katla og Bryndís Lára koma inn í hópinn fyrir Elísu og Sigríði Theód. Guðmundsdóttur frá síðasta leik.

Eina breytingin hjá Blikum er eins og áður segir að Andrea Rán byrjar í stað Rakelar.

Byrjunarliðin eru komin inn

Ein breyting á báðum liðum. Andrea Rán kemur inn í lið Blika í stað Rakel Hönnudóttur sem fer á bekkinn.

Málfríður Anna kemur þá inn í lið Vals fyrir Elísu Viðarsdóttur sem eins og áður hefur komið fram fékk að líta rauða spjaldið í síðustu umferð.

Það er flott teymi sem sér um dómgæsluna í kvöld. Aðaldómari er Elías Ingi Árnason og honum til aðstoðar eru þeir Egill Guðvarður Guðlaugsson (AD1) og Bergur Daði Ágústsson (AD2).

Halldór Breiðfjörð Jóhannsson er eftirlitsmaður og hinn geðþekki Gunnar Oddur Hafliðason er varadómari.

Síðustu vikur hafa verið ólíkar hjá liðunum. Breiðablik þurfti að fara í tveggja vikna sóttkví og hefur því spilað tveimur leikjum minna en Valur. Blikar virðast þó koma ferskar úr kvínni, unnu sannfærandi sigur á ÍBV í síðustu viku og klæjar í tærnar að komast aftur út á völl.

Valskonur hafa verið á siglingu en lentu í áfalli gegn Fylki í síðasta leik. Elísa Viðarsdóttir var rekin af velli strax á upphafsmínútum leiksins og Valur lék því manni færri í rúmar 90 mínútur gegn sterku Fylkisliði. Valskonur stóðu sig hrikalega vel miðað við aðstæður en niðurstaðan þó 1-1 jafntefli.

Það þýðir tvö töpuð stig á Val en Blikar gerðu einmitt eitt jafntefli í fyrra að undanskildum leikjunum gegn Val og það var í raun það sem skildi á milli liðanna á stigatöflunni í lok móts.

Verður það sama uppi á teningnum í ár?

Bæði lið hafa litið hrikalega vel út í upphafi móts og raðað inn mörkum. Elín Metta Jensen er markahæst í deildinni með 8 mörk í 8 leikjum og Berglind Björg Þorvaldsdóttir er næstmarkahæst með 6 mörk í 6 leikjum.

Liðin gerðu jafntefli í innbyrðisleikjum sínum í fyrra og það var alvöru dramatík í þeim báðum.

Fyrri leikurinn var heimaleikur Vals og fór 2-2. Alexandra Jóhannsdóttir jafnaði þá fyrir Blika á lokamínútunum en markið hefði ekki átt að standa þar sem um rangstöðu var að ræða í aðdraganda marksins.

Ekki var dramatíkin minni í síðari leik liðanna. Valskonur þurftu að vinna hann til að tryggja sér Íslandsmeistaratitilinn. Þær leiddu með einu marki fram í uppbótartíma en þá ákvað Heiðdís Lillýardóttir að hún vildi ekki að Valskonur fögnuðu titli á Kópavogsvelli og skoraði jöfnunarmark. Valsarar þurftu því að bíða fram í lokaumferðina með að tryggja sér Íslandsmeistaratitilinn.

Gleðilegan þriðjudag!

Það er komið að því. Fyrri viðureign tveggja bestu liða deildarinnar verður spiluð í kvöld!

Þetta eru liðin sem flestir spá titilbaráttu og þetta eru liðin sem sitja í tveimur efstu sætunum.

Valskonur á toppnum með 16 stig en tvö töpuð stig eftir 6 leiki. Blikar með 12 stig af 12 mögulegum eftir 4 leiki.