Liðin að ganga til vallar og allt til reiðu hér á Domusnova vellinum. Vonandi að við fáum spennandi og skemmtilegan leik og eitthvað af mörkum og dramatík.

Mættir á Domus Nova í einmunablíðu og allt til alls fyrir frábæran knattspyrnuleik.

Það kæmi mér núll á óvart að bæði lið stilli upp í four four f****** two í dag og harkan tæki völdin en viðureignir þessara liða í gegnum tíðina hafa einkennst af mikilli baráttu og hörku.

Fyrri viðureignir

Liðin hafa leikið samtals 28 opinbera leiki samkvæmt gagnagrunni KSÍ. Heimamenn í Leikni hafa sigrað 6 sinnum, 12 leikjum hefur lokið með jafntefli og Ólafsvíkingar sigrað 10 sinnum. Markatalan er svo 33-44

Síðastu viðureignir liðanna voru í deildinni í fyrra. Þar hafði Leiknir 2-0 sigur í Breiðholti með mörkum frá Sólon Breka Leifssyni og Nacho Heras sem nú leikur með Keflavík. Seinni leikurinn í Ólafsvík endaði með 1-1 jafntefli þar sem Árni Elvar Árnason skoraði fyrir gestina en Guðmundur Magnússon skoraði fyrir Ólsara.

Leiknir.R

Leiknismenn undir stjórn Sigurðar Höskuldssonar eru mikil ólikindatól. Geta á sínum degi lagt öll lið deildarinnar og það sannfærandi en hafa á köflum í sumar sogast niður í meðalmennsku og átt slæma leiki.

Leiknisliðið er þó eitt það skemmtilegasta í deildinni og finni liðið meiri stöðugleika eru þeir klárlega kandidatar í það að fara upp í Pepsi Max í haust.

Sævar Atli fyrirliði og Vuk Óskar eru leikmenn sem ég hvet fólk til að fylgjast með sem og Guy Smit í markinu sem hefur verið öflugur í upphafi móts. Leiknisliðið er þó í heild vel spilandi og verður spennandi að fylgjast með þeim takast á við Ólsara á Domus Nova vellinum nú í kvöld.

Víkingur Ó

Eins og allir ættu að vita núna voru miklar hræringar i herbúðum Ólsara í liðinni viku. Jóni Páli Pálmarssyni var sagt upp störfum sem þjálfari vegna samstarfsörðugleika. Mikið hefur verið rætt um hverjir téðir örðugleikar hafi verið en Elvar Geir Magnússon og Baldvin Már Borgarson ræddu þessi mál sem og önnur tengd Lengjudeildinni í útvarpsþætti Fótbolta.net síðastliðinn laugardag sem hlusta má á HÉR

Við starfinu í Ólafsvík tók auðvitað goðsögnin og frasakóngurinn Guðjón Þórðarson sem eftir átta ára fjarveru frá Íslenskum fótbolta snýr aftur en síðast þjálfaði hann Grindavík í efstu deild árið 2012. Guðjón þjálfaði NSÍ í Færeyjum í fyrra með fínum árangri og verður spennandi að sjá hvernig Ólsurum reiðir af undir hans stjórn. Guðjón er einn af reyndustu þjálfurum landsins og hefur orðið Íslandsmeistari sem þjálfari KA og ÍA, bikarmeistari með ÍA og KR ásamt því að þjálfa Íslenska landsliðið, félög í Englandi, Noregi og eins og áður segir Færeyjum.
Það má því segja að það sé fengur fyrir deildina og knattspyrnu á Íslandi að fá þennan skemmtilega karakter aftur í boltann hér heima.

Ólsarar sitja í 9,sæti deildarinnar fyrir leik kvöldsins með sex stig og þurfa nauðsynlega að fara að hala inn stig á töfluna ef þeir ætla ekki að hanga í neðri hlutanum þetta sumarið.

Gott kvöld kæru lesendur og verið líkt og alltaf hjartanlega velkomin í beina textalýsingu frá leik Leiknis.R og Víkings.Ó í 7.umferð Lengjudeildar karla.

Víkingar eru að mæta til leiks með nýjan þjálfara og þurfa að fara að setja stig á töfluna og slíta sig lengra frá botnliðunum.
Á meðan geta heimamenn komist á toppinn í það minnsta um stundarsakir með sigri.