Hér er allt að verða klárt. Drekar gegn Víkingum í glampandi Sól.

Liðin mæta út á völlinn í sitthvoru lagi. Fyrst heimamenn og nú Víkingar. Fyrirliðinn Sölvi Geir Ottesen leiðir sína menn út á völlinn.

Heimamenn fengu hvorki fleiri né færri en átta nýja leikmenn fyrir þessa leiktíð. Þeir bættu til dæmis við sig miðverðinum Uros Korun, 33 ára, og 22 ára gömlum markverði, Ziga Frelih, sem kom úr króatísku B-deiildinni. Báðir eru í byrjunarliðinu í dag.

Víkingar hafa spilað tólf Evrópuleiki í sögu félagsins og tapað þeim öllum. Þeir náðu geggjuðum úrslitum gegn frábæru liði Real Sociedad árið 1983 í Evrópukeppni Meistaraliða með 0-1 tapi heima og 2-3 tapi úti en Sociedad-liðið fór alla leið í undanúrslit keppninnar. Víkingar héldur einnig í við stórlið CSKA Moskvu árið 1992 á heimavelli en töpuðu, 1-0.

Nú verður aðeins spilaður einn leikur þannig að fyrsti sigur Víkings í Evrópukeppni myndi einnig koma liðinu áfram í næstu umferð.

Aðeins tveir leikmenn Víkinga voru í hópnum þegar að liðið var síðast í Evrópukeppni árið 2015 en það eru þeir Halldór Smári Sigurðsson og Dofri Snorrason. Dofri byrjaði annan leikinn en Halldór Smári sat á bekknum í báðum leikjum.

Evrópureynslan er þó gríðarlega í þeim Kára og Sölva sem báðir hafa spilað í riðlakeppni Meistaradeildarinnar. Kári hefur verið meiddur undanfarnar vikur og var í raun sparaður fyrir þennan leik sem og Halldór Smári þannig þeir eru ekki í mikið betri leikæfingu en Slóvenarnir sem voru að losna úr sóttkví.

Smá sögulegt samhengi. Olimpija Ljubljana var stofnað árið 2005 þegar að félag með sama nafn, í raun sama félagið, fór á hausinn. Það hafði þá verið til frá því 1945. Það var endurstofnað sem NK Bezigrad og fór beint í fimmtu efstu deild. Það vann fimmtu deildina á fyrsta ári og það sama gerðist í fjórðu deild, þriðju deild, annarri deild og fyrstu deild. Það fór upp um fjórar deildir á fjórum árum og hafnaði í fjórða sæti efstu deildar á fyrstu leiktíð sinni aftur á meðal þeirra bestu árið 2010. Það skipti nokkrum sinnum um nafn á leiðinni og endurheimti loks upprunalega nafnið. Slóvenska knattspyrnusambandið lítur á núverandi lið sem sjálfstætt félag en Drekarnir halda fast í sögu gamla félagsins.

Það sem vinnur með Víkingum er að leikmenn Drekanna, eins og heimamenn eru kallaðir, eru nýkomnir úr tveggja vikna sóttkví vegna Covid-19 smits. Þeir hafa aðeins náð nokkrum æfingum en veiran skæða hefur komið í veg fyrir að slóvenka úrvalsdeildin fari af stað.

Fregnir innan úr herbúðum Víkinga herma að Arnar Gunnlaugsson ætli ekki að spila 5-3-2 og pakka í vörn í dag heldur reyna að sækja og mæta slóvenska liðinu úti á vellinum. Hann sagði við strákana á fundi að liðið ætti ekki séns ef það lægi bara á teig og biði eftir að heimamenn myndu gera árás. Víkingsliðinu hefur gengið bölvanlega að skora á tímabilinu þrátt fyrir að vera mikið með boltann og ekki hefur varnarleikurinn verið neitt sérstakur. Það er ekki uppskrift að árangri en sjáum hvað setur í dag.

Talandi um Milan Mandaric þá muna unnendur enska boltans væntanlega eftir þeim mikla meistara sem átti Portsmouth þegar að Hermann Hreiðarsson spilaði þar og varð bikarmeistari. Þessi 81 árs gamli Serbi átti síðar eftir að kaupa Leicester og Sheffield Wednesday en er nú eigandi Olimpija Ljubljana. Vel hefur farið á með Milan og jakkalökkum Víkinga en Mandaric er víst höfðingi heim að sækja.

Þriðja sætið var greinilega ekki nóg fyrir Milan Mandaric, eiganda Olimpjia, á síðustu leiktíð og hvað þá að detta út í 16 liða úrlitum bikarsins. Þjálfarinn var látinn fara og tók Króatinn Dino Skender frá Króatíu við. Skender er aðeins 36 ára gamall og stýrði liði á sínu fyrsta og eina tímabili í efstu deild á síðustu leiktíð þegar að hann var við stjórnvölinn hjá Osijek í Króatíu. Áhugaverð ráðning.

Þó svo að heimamenn séu ekki stærsta nafnið í bransanum er þetta hörku helvítis lið sem á að vera miklu betra en Víkingsliðið. Það hafnaði í þriðja sæti slóvensku úrvaldeildarinnar í fyrra, öðru sæti þar áður og varð meistari 2018. Liðið varð einnig bikarmeistari 2018 og 2019. Í liðinu eru nokkrir ansi öflugir leikmenn en þeirra bestur er líklega framherjinn Ante Vukusic. Króatinn varð markahæsti leikmaður slóvensku úrvaldeildarinnar á síðustu leiktíð með 26 mörk.

Víkingar spila 3-5-2 í dag með Ingvar í markinu, Halldór Smára, Sölva og Kára í vörninni, Davíð og Atla sem vængbakverði, Júlíus, Erlingur og Ágúst Eðvald á miðjunni og þeir Niko og Óttar frammi.

Þetta er fyrsti Evrópuleikur Víkings í fimm ár eða síðan liðið fór einnig til Slóveníu í fyrstu umferð forkeppni Evrópudeildarinnar. Víkingar gerðu flotta ferð og náðu 2-2 jafntefli við liðið Koper á útivelli en höfðu áður tapað, 1-0, á heimavelli og féllu því úr keppni. Koper var ári síðar gert að fara niður í fjórðu deild slóvenska boltans þar sem að liðið náði ekki keppnisleyfi í efstu deild. Það vann sig upp í efstu deild ár fyrir ár og er nýliði núna í slóvensku úrvalsdeildinni þar sem að Ólympíumenn náðu öðru sæti á síðustu leiktíð.

Daginn, allan daginn. Klukkan 16.30 að íslenskum tíma verður flautað til leiks í Ljubljana, glæsilegri höfuðborg Slóveníu, þar sem að Víkingar mæta heimamönnum í Ólympíu í 1. umferð forkeppni Evrópudeildarinnar. Við fylgjumst með öllu sem gerist.