Liðin ganga út á völl. Ísland leikur í bláu í dag þar sem liðið er heimalið, Ari leiðir okkar stráka inn á völlinn.

Guendouzi leiðir hvítklædda Frakka inn á völlinn.

Leikmenn gengnir til búningsherbergja fyrir lokaundirbúning fyrir leik. Endilega nota #fotboltinet á Twitter, gæti vel laumast inn eitt og eitt tíst í lýsinguna.

Frakkarnir stilla upp í 4-3-3. Fjórar breytingar frá sigrinum gegn Rússum. Guendouzi, Claude-Maurice, Maouassa og Badiashile koma inn í liðið.

Lafont
Dagba - Kounde - Badiashile - Maouassa
Claude-Maurice - Tchouameni - Guendouzi (f)
Ikone - Edouard - Gouiri

Leikmenn eru að ganga inn á völlinn í upphitun. 40 mín í leik, mjög hlýtt, sól og logn!

Byrjunarlið U21 landsliðsins - Ari fyrirliði í 5-3-2 kerfi

Varnarmaðurinn Ari Leifsson er fyrirliði í dag þar sem Jón Dagur er farinn til Liechtenstein. Davíð Snorri stillir upp í 5-3-2 kerfi með Ara, Róbert Orra Þorkelsson og Finn Tómas Pálmason í miðvarðalínunni.

Andri Fannar Baldursson kemur inn á miðjuma og þeir Valdimar Þór Ingimundarson og Brynjólfur Willumsson spila fremstir.

Alls eru átta breytingar frá síðasta leik.

Davíð Snorri Jónasson þjálfari liðsins sat fyrir svörum á fréttamannafundi í gær.

Hver er lykillinn að því að ná góðum úrslitum á morgun?

,,Ég veit ekki hversu mikið franska pressan ætlar að pikka upp frá okkur en lykilatriðið er að lenda ekki í eltingarleik, vera með Frakkana fyrir framan okkur, neita þeim um svæðin úti á köntunum, þegar kantmennirnir koma inna og að sama skapi að reyna fá augnablik þar sem Frakkarnir þurfa að hugsa hraðar."

,,Við viljum hafa þá fyrir framan okkur, viljum ekki tapa einn á móti einum og viljum stjórna því í hvaða svæði boltinn fer. Við þurfum að halda 100% einbeitingu, erum að fara spila á móti mjög góðu liði og mjög góðum einstaklingum."

Líturu á þennan leik sem fyrsta leik hjá næsta liði, sem mun spila í næstu undankeppni?

,,Fyrsta skrefið og ekki fyrsta skrefið. Við erum ennþá í möguleika, það má ekki gleyma því. Við þurfum að nýta allt sem við getum úr þessum leik og næsta lið er bara næsta lið. Við erum lið núna á stórmóti sem við erum stoltir af og hefur staðið sig að mörgu leyti mjög vel."

,,Þannig við ætlum að nýta allt sem við getum í þessum leik. Við erum ekkert endilega að undirbúa næsta lið en aftur á móti hafa verið breytingar á hópnum. Þetta snýst um að klára þennan glugga 100%," sagði Davíð.

Andri Fannar Baldursson sat fyrir svörum á fréttamannafundi í gær.

,,Þeir eru með frábær nöfn á blaði og hafa sannað að þeir eru mjög góðir í fótbolta. Þer verða líklega miklu meira með boltann en við getum staðið saman og gefið þeim leik. Ef við nýtum færin okkar og spilum góðan varnarleik þá eigum við möguleika," sagði Andri en hann segir að andinn í íslenska hópnum sé góður þrátt fyrir tvö töp hingað til.

,,Andinn er góður. Við erum allir á því að við ætlum að gefa allt sem við eigum í þennan síðasta leik og reyna að ná í úrslit gegn Frökkum. Það verður erfitt en við ef við erum samstíga og er allir leggja sig 100% þá getum við náð úrslitum. Við erum allir staðráðnir í að gera betur."

Frá æfingu í gær

Þetta er sterkasta lið Frakka að mati Arnars Laufdals Arnarssonar.

Ef þetta lið mætir til leiks þá verða fimm breytingar á liði Frakka frá sigrinum gegn Rússum á sunnudag. Þrjár breytingar á miðjunni, ein í vörninni og markvarðarbreyting.

Liðið gegn Rússum (2-0 sigur): Lafont, Dagba, Kounde, Konate, Truffert, Tchouameni, Soumare, Ikone (1 mark), Faivre, Edouard (1 mark), Gouri.

Hér má sjá líklegt byrjunarlið að mati fréttaritara. Átta breytingar á byrjunarliðinu:

Fjórir leikmannanna sem byrjuðu á sunnudag standa Davíð Snorra Jónassyni, þjálfara liðsins, ekki til boða. Þeir Jón Dagur Þorsteinsson, Sveinn Aron Guðjohnsen og Willum Þór Willumsson eru farnir til Sviss í A-landsliðið og þá er Ísak Óli Ólafsson meiddur.

Spá fréttaritara er sú að Alex Þór Hauksson, Kolbeinn Birgir Finnsson og Mikael Neville Anderson haldi sæti sínu í liðinu. Hörður Ingi Gunnarsson, Ari Leifsson og Stefán Teitur Þórðarson taka sér sæti á bekknum.

Í spánni koma þeir Andri Fannar Baldursson, Brynjólfur Andersen Willumsson, Elías Rafn Ólafsson, Finnur Tómas Pálmason, Kolbeinn Þórðarson, Róbert Orri Þorkelsson, Valdimar Þór Ingimundarson og Valgeir Lunddal Friðriksson inn í liðið.

Leikurinn er lokaleikur liðanna í riðlinum og þurfa bæði lið á sigri að halda. Ísland þarf að vinna með fjögurra marka mun en upp gæti komið sú staða að Frökkum dugi jafntefli ef Rússland vinnur ekki gegn Danmörku.

Ísland hefur tapað báðum leikjum sínum til þessa en Frakkar eru með þrjú stig eftir sigur gegn Rússum en tap gegn Dönum.

Góðan daginn kæri lesandi. Vertu velkominn í beina textalýsingu frá leik Íslands og Frakklands í C-riðli Evrópumótsins í flokki U21 árs landsliða.