Fyrir þá sem eru á leið á völlinn eru sólgleraugu staðalbúnaður. Og úlpa eða þykk peysa sömuleiðis. Sólin skín vissulega en það er svöl norðanátt og nokkuð napurt til kyrrsetu.

Byrjunarliðin

Byrjunarliðin eru mætt í hús eins og vera ber fyrir leik. Gaman að sjá að Hólmfríður er ekkert að bíða með hlutina heldur er mætt beint í startið. Bíð spenntur eftir því að sjá hverning Amelía Rún kemur inn í leikinn en hún er afskaplega spennandi leikmaður sem verður gaman að fylgjast með á næstu árum.

Fyrri viðureignir

Liðin hafa leikið 14 leiki innbyrðis frá aldamótum samkvæmt gagnagrunni KSÍ. Engum þessara 14 leikja hefur lokið með jafntefli en gestirnir hafa sigrað alls 11 sinnum en heimakonur 3.

Markatalan er 20-36 Selfoss í vil.

Síðasti leikur liðanna var viðureign liðanna í Lengjubikarnum nú í vetur. Lokatölur þar urðu 8-2 fyrir Keflavík. Held það sé þó óhætt að fullyrða að þau úrslit séu á engan átt til þess fallinn að spá fyrir um leik kvöldsins enda hafa mannabreytingar átt sér stað og útlendingar komið sem styrkja liðin. Það er þó áhugavert við þennan sigur Keflavíkur að Selfoss varð fyrir því óláni að skora alls 3 sjálfsmörk í þessum leik sem er nú ansi vel í lagt.

Aðstæður

Veðurfarslega eru aðstæður allar hinar bestu. Smá norðan gjóla,sólin skín og reykjarmökkurinn frá gosstöðvunum sést vel frá Keflavík ásamt kvikustrókum þegar þeir rísa hvað hæst. Toppnæs það.

Völlurinn
Verandi búsettur í Keflavík hef ég fylgst með Nettó-vellinum lifna við undanfarnar vikur. Var ekkert rosalega bjartsýnn á tímabili en það bregst ekki að starfsmenn vallarsins vinna kraftaverk og ég held að völlurinn sé hreinlega eins góður og hann getur orðið á þessum árstíma.

Lið kvöldsins

Ég hef takmarkaðar upplýsingar um ástand leikmannahópa liðanna fyrir leik kvöldsins. Þó er víst að markvörðurinn Anke Preuss verður ekki í marki Selfoss í kvöld. Guðný Geirsdóttir sem er komin með leikheimild á láni frá ÍBV verður því að öllum líkindum í markrammanum. Þá er spurning hvort Hólmfríður Magnúsdóttir spili mikið í kvöld en hún gaf það út á dögunum að hún væri hætt við að hætta og ætlar sér að taka slaginn með Selfoss í sumar sem verða að teljast gleðitíðindi.

9. Keflavík

Lokastaða í fyrra: Keflavík er komið aftur í deild þeirra bestu eftir ekki nema eins árs fjarveru. Keflavíkurstelpur virkuðu mjög sannfærandi í Lengjudeildinni í fyrra en höfnuðu að lokum í öðru sæti á eftir Tindastóli.

Þjálfarinn: Gunnar Magnús Jónsson hefur þjálfað Keflavík frá 2016 og er hann á leið í sitt annað tímabil í Pepsi Max-deildinni með liðið. Síðast fór liðið beint aftur niður; hvað gerist í sumar? Gunnar hefur einnig reynslu úr þjálfun hjá yngri flokkum Keflavíkur auk þess sem hann þjálfaði kvennalið Grindavíkur og karlalið Njarðvíkur um tíma.

Álit Jóa
Jóhann Kristinn Gunnarsson er sérfræðingur Fótbolta.net í Pepsi Max-deild kvenna líkt og síðustu ár. Hér er álit hans á liði Keflavíkur.

Keflavík eru enn á ný komnar upp í Pepsi Max og vilja örugglega treysta sig betur í deildinni en undanfarið. Þær eru að styrkja sig og spennandi verður að sjá hvernig tælenskur landsliðsmarkvörður á eftir að fóta sig í íslenska boltanum. Hún verður þó líklega að berjast við Katrínu Hönnu Hauksdóttur um stöðuna en Katrín kom aftur til Keflavíkur í vetur frá Augnabliki. Hún hefur reynslu úr efstu deild með Keflavík og allt hjálpar það í baráttunni, segir Jóhann.

Heilmikil reynsla og gæði
Það er nefnilega heilmikil reynsla í hópnum hjá Keflvíkingum og gæði. Ef leikmennirnir sem þær fá í ár hafa gæðin líka er aldrei að vita nema Keflavíkurstúlkur haldi sér áfram í deildinni þvert á spá spekúlantanna.

Þær hafa virkað öflugar í leikjunum á undirbúningstímabilinu og það virðast vera mörk í liðinu. Það er líka ansi öflugt að hafa Natöshu sem er leikmaður á landsliðs leveli með mikil gæði og reynslu. Hún dregur vagninn í sumar eins og áður en ætli Keflavíkurliðið að halda sér uppi þá verða þær að ná góðum takti og finna stöðugleikann sem þarf við stigasöfnun.

Lykilmenn: Natasha Moraa Anashi. Hún er einfaldlega vélin, gírkassinn og stýrið í liðinu. Svo verður að setja inn markvörðinn Tiffany Sornpao sem þarf að standa vaktina vel fyrir aftan Keflavíkurvörnina í sumar.

Gaman að fylgjast með: Amelía Rún Fjeldsted er ungur og efnilegur leikmaður sem þekkir það að skora í þessari deild áður, þrátt fyrir ungan aldur. Hún hefur verið að skora á undirbúningstímabilinu og gaman verður að fylgjast með þessum marksækna leikmanni á vellinum í sumar.

4. Selfoss

Lokastaða í fyrra: Selfoss varð bikarmeistari árið 2019 og stefndi á að berjast um Íslandmeistaratitil í fyrra. Það gekk þó ekki en liðið komst aldrei í titilbaráttu og endaði í 4. sætinu að lokum.

Þjálfarinn: Alfreð Elías Jóhannsson er sem fyrr við stjórnvölinn á Selfossi. Hann tók við liðinu fyrir tímabilið 2017 og hefur gert góða hluti. Hann þjálfaði áður karlalið BÍ/Bolungarvíkur og Ægis.

Álit Jóa
Jóhann Kristinn Gunnarsson er sérfræðingur Fótbolta.net í Pepsi Max-deild kvenna líkt og síðustu ár. Hér er álit hans á liði Selfoss.

Það hefur nógu mikið verið rætt og ritað um vonbrigðasumar Selfyssinga í Pepsi Max deild kvenna á síðasta tímabili. Eitt er víst að liðið og þjálfarinn hafa ekki setið auðum höndum í vetur og þær ætla sér klárlega að koma sterkari inn í mótið í ár. Þó stór nöfn vanti frá í fyrra þá er vel haldið um taumana á Selfossi og hópurinn æfir vel.

Spáin gerir ráð fyrir að Selfyssingar hafi lært
Eins og hjá öllum öðrum þá skiptir miklu máli að fylla skarð þeirra sem hverfa á braut. Hvort sem lið gera það innanfrá og/eða utanfrá þá verður það að ganga vel upp. Pressan á Selfoss liðinu er minni í ár en þær og aðrir settu mikla pressu á sig fyrir mót í fyrra. Spáin gerir ráð fyrir að Selfyssingar hafi lært af síðasta tímabili og komi betur inn í deildina 2021.

Reyndur, þýskur markvörður var fenginn til að loka búrinu en nú er ljóst að hún verður eitthvað frá vegna meiðsla. Guðný Geirsdóttir leysir hana af í byrjun móts en hún kemur á láni frá ÍBV. Aðrar viðbætur verða að hafa mikil áhrif til að fylla upp í fyrir þær sem vantar frá í fyrra. Eva Núra er baráttu jaxl af gamla skólanum og smellur hugsanlega vel inn í baráttuglatt Selfoss liðið.

Góð byrjun á mótinu er algjört lykilatriði fyrir Selfoss ef þessi spá á að ganga eftir. Skipulag, agi og barátta á eftir að skila þeim í efri hluta deildarinnar samkvæmt spánni. Leikir á undirbúningstímabilinu hafa svolítið litast af litlum hópi og stöðugleikinn verður að koma fljótlega enda verulega stutt í mót. Það er uppgangur á Selfossi og aðstaða og umhverfi er til fyrirmyndar. Það litar spá þessa tímabils að fá lið geta orðið keppt við aðstæður og umgjörð eins og verið er að skapa þessi misserin á Selfossi.

Lykilmenn: Barbára Sól Gísladóttir, Anna María Friðgeirsdóttir og Eva Núra Abrahamsdóttir.

Gaman að fylgjast með: Erlendu leikmönnunum og hvað þær færa liðinu. Svo verður gaman að fylgjast með Katrínu Ágústsdóttur sem er fædd árið 2005. Það er spennandi leikmaður, eins og reyndar fleiri ungir leikmenn á Selfossi.

Biðin eftir nýju tímabili hefur verið löng hjá liðunum og spennan eflaust mikil í báðum leikmannahópum að hefja tímabilið eftir þrotlausar æfingar í vetur. Það verður ekkert hugsað um Covid á vellinum og liðin eflaust bæði staðráðin í að byrja mótið af krafti og sækja sín fyrstu 3 stig. En við skulum kynna okkur liðin sem hér mætast og byrja á gestunum.

Gott kvöld kæru lesendur og verið hjartanlega velkomin í beina textalýsingu Fótbolta.net frá leik Keflavíkur og Selfoss í fyrstu umferð Pepsi Max deildar kvenna í knattspyrnu.