FIFA-dómarinn Bríet Bragadóttir kemur til með að dæma leikinn og henni til aðstoðar verða þeir Rögnvaldur Þ. Höskuldsson og Jakub Marcin Róg. Varadómari er Eiður Otto Bjarnason og eftirlitsmaður Bergur Þór Steingrímsson.

Landsliðskonan Elísa Viðarsdóttir hefur tekið við fyrirliðabandi Vals. Ásgerður Stefanía bar það í fyrra en hún er í barneignarfríi.

Ungfrú Garðabær, Anna María Baldursdóttir, ber bandið hjá Stjörnunni. Mjög sterkt fyrir Garðbæinga að hún sé heil heilsu og klár í tímabilið.

Það er gullfallegt veður í hlíðinni góðu og leikmenn beggja liða njóta þess að hita upp. Fálkarnir standa sína vakt á grillinu og áhorfendur eru farnir að tínast í vel merkt sætin sín.

Byrjunarliðin eru klár eins og sjá má hér til hliðar.

Það er ekkert óvænt að sjá hjá heimakonum hvað varðar liðsval. Við sjáum svo betur þegar leikur hefst hvernig Pétur stillir liðinu upp. Lillý Rut væri alla jafna í liðinu en hefur verið að glíma við meiðsli í vetur og er á bekknum.

Hjá Stjörnunni fær Chante traustið í markinu. Það vekur athygli að nýliðinn Heiða Ragney er á bekknum. Spurning hvort hún sé eitthvað tæp.

Breytingar hafa orðið á leikmannahópum beggja liða og ljóst að byrjunarliðin í kvöld verða ólík þeim liðum sem enduðu mótið í fyrra.

Birta Guðlaugsdóttir og Chante Sandiford berjast um markmannsstöðuna hjá Stjörnunni og hjá Val er einnig hart barist um ýmsar leikstöður.

Það verður t.d. gaman að sjá hvort nýjasti leikmaður þeirra. Clarissa Larisey komi strax inn í byrjunarliðið.

Larisey er kanadísk og er sögð vera fjölhæfur leikmaður sem geti leyst margar stöður framarlega á vellinum.

Valur

Lokastaða í fyrra: Valur endaði í 2. sæti deildarinnar í fyrra eftir að hafa verið spáð 2. sætinu. Liðið var tveimur stigum á eftir Breiðablik en lék einum leik meira. Liðið tapaði báðum leikjunum gegn Breiðabliki og gerði eitt jafntefli gegn Fylki. Hina leikina vann liðið.

Þjálfarinn: Pétur Pétursson er á sínu fjórða ári sem þjálfari Vals. Pétur er þaulreyndur þjálfari sem hefur unnið Íslandsmeistaratitla bæði með karla og kvennalið. Honum til aðstoðar er Eiður Benedikt Eiríksson.

Álit Jóa
Jóhann Kristinn Gunnarsson er sérfræðingur Fótbolta.net í Pepsi Max-deild kvenna líkt og síðustu ár. Hér er álit hans á liði Vals.

,,Valur var lang næstbesta liðið í fyrra. Frábært lið og góðir þjálfarar. Breiðablik voru bara einu númeri of sterkar. Það er eitthvað svo ótrúlega heillandi við samsetningu liðsins í ár. Eiginlega alveg banvæn blanda af reynsluboltum sem hafa unnið marga titla og svo ungar og efnilegar stelpur sem eru með mikla reynslu miðað við aldur. Bæði með félags-og landsliðum. Liðið virkar heilsteypt og breiddin er orðin ansi álitleg á hópnum.´´

,,Sterkur og reyndur leikmannahópur og metnaðarfullt þjálfarateymi á eftir að sigla Íslandsmeistaratitlinum að Hlíðarenda tímabilið 2021 samkvæmt spánni. Það er mikið lagt í liðið og samkeppni um stöður er mikil. Sterkir leikmenn eins og Anna Rakel og Sísí hafa bæst við góðan hóp og það er kraftur í kringum Val þetta árið eins og oft áður. Þær eru sterkasta lið landsins á umtöluðum pappírum fyrir tímabilið.´´

Lykilmenn: Elín Metta Jessen, Elísa Viðarsdóttir og Sandra Sigurðardóttir.

Gaman að fylgjast með: Anna Rakel Pétursdóttir kemur fersk úr atvinnumennskunni í Svíþjóð og Mary Alice Vignola sem gerði gott mót með Þrótti í fyrra.

Stjarnan

Lokastaða í fyrra: Eftir mörg ár á meðal bestu liða landsins hurfu margir lykilmenn á braut og uppbygging hefur verið í gangi í Garðabænum. Liðið endaði í 5. sæti árið 2019 og 6. sætið varð niðurstaðan í fyrra.

Þjálfarinn: Kristján Guðmundsson er á sínu þriðja tímabili sem þjálfari Stjörnunnar. Gífurlegar reyndur þjálfari sem hefur meðal annars unnið bikarmeistaratitla með karlaliðum Keflavíkur og ÍBV á ferli sínum. Kristján hefur þjálfað lengi á Íslandi auk þess sem hann þjálfaði HB í Færeyjum á sínum tíma.

Álit Jóa:
Jóhann Kristinn Gunnarsson er sérfræðingur Fótbolta.net í Pepsi Max-deild kvenna líkt og síðustu ár. Hér er álit hans á liði Stjörnunni.

,,Stjarnan er í miðjupakkanum með nokkrum öðrum liðum miðað við síðustu tvö tímabil. Mjög ungir leikmenn eru að fá traustið og spila dýrmætar mínútur við bestu lið landsins. Það eru án efa margir að bíða eftir því að Stjarnan fari að færa sig ofar í töflunni enda örfá ár síðan liðið var að berjast um alla titla á hverju ári. Það er mikill sigurvilji í kringum félagið og spurning hvort liðið sé á leiðina í þá áttina eða hvort menn sýni áfram þolinmæði við uppbygginguna.´´

,,Það er mjög sterkt að hafa Önnu Maríu Baldursdóttur í liðinu sem fyrirliða og reynslubolta. Hún hefur séð allt í þessu sporti og unnið alla titlana. Mjög gott fyrir yngri leikmenn liðsins. Það var sniðugt hjá Kristjáni að ná í Chante Sandiford í markið og Heiðu Ragney á miðjuna. Öflugir leikmenn með reynslu og vilja til að ná lengra.´´

,,Ungu stelpurnar í liðinu fá líklega meira kastljós í sumar og spennandi verður að fylgjast með 16-17 ára stelpunum sem eru að koma mjög öflugar inn í liðið. Kristján er frábær þjálfari sem á eftir að gera góða hluti úr þeim efnivið sem hann hefur. Það er spurning hvort Stjarnan verður áfram í sama miðjupakkanum eða hvort þær taki skref í aðra hvora áttina. Spáin að þessu sinni gerir ráð fyrir óbreyttu ástandi.´´

Lykilmenn: Chante Sandiford, Anna María Baldursdóttir og Heiða Ragney Viðarsdóttir.

Gaman að fylgjast með: Jafnöldrurnar (fæddar 2004) og yngri landsliðsstelpurnar Snædís María Jörundsdóttir og Sædís Rún Heiðarsdóttir eiga eftir að vekja athygli í sumar með Stjörnunni.

Heil og sæl!

Verið velkomin í beina textalýsingu frá leik Vals og Stjörnunnar í 1. umferð Pepsi Max-deildarinnar þetta sumarið!

Við höfum beðið spennt síðan í haust og nú er loksins komið að þessu.

Valskonun er víðast hvar spáð Íslandsmeistaratitlinum í ár en þær urðu að láta sér silfrið nægja á síðasta tímabili.

Stjörnunni hefur verið spáð hingað og þangað, yfirleitt um miðju eða neðar. Hér á Fótbolta.net var þeim spáð 7. sæti en þjálfarinn Kristján Guðmundsson sagði í viðtali að liðið stefni á efri hlutann.