GPL10 í banni

Fyrir þá sem eru að velta því fyrir sér hvað Guðjón Pétur Lýðsson er þá er hann í leikbanni og því ekki löglegur í kvöld.

Það er ákveðið skarð hoggið í lið Grindavíkur fyrir sumarið en hinn litríki fyrirliði liðsins undanfarin ár Gunnar Þorsteinsson fluttist búferlum til New York í vetur og nemur þar við Columbia háskólann.

Ákveðin sjónarsviptir af honum hér á Grindavíkurvelli en Gunnar skemmtilegur karakter og hefur verið algjör leiðtogi liðsins undanfarin ár. Sigurjón Rúnarsson sem tekið hefur við fyrirliðabandinu er þó ekki síðri og verður gaman að fylgjast með fyrirliðanum unga í vörninni þetta sumarið.

Byrjunarliðin

Byrjunarlið kvöldsins eru mætt hér til hliðar eins og vera ber.
Það er ýmislegt sem maður er spenntur að sjá í liðum kvöldsins.
Gonzalo Zamorano er mættur á eyjuna fögru og verður gaman að sjá hvernig hann mun passa inn í lið eyjamanna. Spillir eflaust ekki fyrir honum að geta tjáð sig á spænsku við samherja sinn Sito sem er fyrrum leikmaður Grindavíkur og lék með liðinu sumarið 2018 í efstu deild.

Hjá Grindavík er Dion Acoff eflaust sá sem flestir munu hafa augun á. Leikmaðurinn átti erfitt og meiðslum hrjáð tímabil með Þrótti í fyrra en Grindvíkingar vona eflaust að vængmaðurinn hraði muni finna sitt fyrra form í gulu treyjunni. Josip Zeba er enn á sínum stað í vörn Grindavíkur og hefur fengið það í gegn að leika í treyju númer 9 þetta sumarið. Hvort það sé ávísun á mörk frá honum verður að koma í ljós.

200 áhorfendur eru leyfðir á leik kvöldsins samkvæmt sóttvarnarreglum. Það hefur loðað við Grindavík undanfarin ár að ekki hefur verið neitt sérlega vel mætt í stúkuna en vonandi horfir það þó til bóta. Það er þó ekki loku fyrir það skotið að fótboltaþyrstir göngugarpar sem ætla leggja leið sína á gosstðvarnar í kvöld geti fengið miða á leikinn, fengið sér að borða Hjá Höllu og haldið síðan í gönguna upp í Geldingadali.

Úlfur spáir í spilin
Úlfur Blandon, einn af sérfræðingum Fótbolta.net um Lengjudeildina og Pepsi Max-deildina, spáir í fyrstu umferðina

Grindavík - ÍBV 0-1
Eyjamenn mæta sprækir til leiks og sýna úr hverju þeir eru gerðir eftir viðburða ríka daga að undanförnu. Gonzalo Zamorona setur markið sem skilur liðin að og sýnir að það eru fleiri sem getað skorað mörk en Gary Martin

4. Grindavík
Grindvíkingar eru á leið í sitt annað tímabil í röð í Lengjudeildinni eftir að hafa fallið úr efstu deild 2019. Það vantaði ekki mikið upp á að liðið væri með í baráttunni um að fara upp á lokasprettinum í fyrra. Þeir þurfa að breyta öllum jafnteflisleikjunum í sigurleiki en Grindavík gerði átta jafntefli í 19 leikjum í fyrra.

Þjálfarinn: Sigurbjörn Hreiðarsson stýrir Grindavík annað árið í röð. Sigurbjörn var aðstoðarþjálfari Ólafs Jóhannessonar hjá Val þar áður en þeir skiluðu liðinu tveimur Íslandsmeistaratitlum og tveimur bikarmeistaratitlum. Hann þjálfaði einnig Hauka í Hafnarfirði.

Álit sérfræðings
Eiður Ben Eiríksson, Rafn Markús Vilbergsson og Úlfur Blandon eru sérfræðingar Fótbolta.net fyrir Lengjudeildina í ár. Eiður Ben gefur sitt álit á liði Grindavíkur.

Þjálfarateymið er á sínu öðru tímabili með liðið og þekkir betur inná styrkleika og veikleika liðsins. Liðið var gagnrýnt í fyrra fyrir að tapa niður forystu seint í leikjum og ef maður rýnir í frammistöður síðasta sumars er merkilegt að sjá hvernig gengi liðsins snérist þegar leið á mótið. Liðið var í fínum möguleika á að komast í efstu deild þegar mótið var flautað af og er líklega það lið sem var hvað svekktast með þá niðurstöðu ásamt auðvitað Fram. Það er eðilegt að lið sem fellur úr efstu deild, verst flesta leiki aftarlega á vellinum og er með lítið sjálfstraust sé ekki að fara spila blússandi sóknarbolta í fyrsta leik árið eftir. Liðið spilaði betri og betri fótbolta þegar leið á síðasta tímabil og var handbragð Bjössa og Óla komið á liðið þegar líða tók á mótið.

Ég tel að liðið hafi fleiri vopn fram á við heldur en í fyrra, allir sem fylgjast með íslenskum fótbolta vita hvað Dion getur gefið liðum fram á við, hann mun nýtast þeim þegar liðin ætla að stíga hátt með varnarlínuna sína, einnig mun hann geta gefið þeim aukin kraft þegar liðið vill leggjast aftar á völlinn og beita skyndisóknum. Tiago er einnig frábær liðsstyrkur fyrir liðið, þessir tveir leikmenn munu breyta liðinu til hins betra sóknarlega en hvort að þessir leikmenn gefi liðinu eitthvað meira verður að koma í ljós.

Það hafa orðið breytingar á hópi Grindavíkur í vetur, góðir leikmenn hafa horfið á braut og í staðinn hefur liðið náð að styrkja sig með öðruvísi leikmönnum. Liðið hefur skipt um markmann, einnig eru breytingar á varnarlínunni, miðjunni og sókninni. Ég tel að liðið sé komið með betur spilandi leikmenn en misst þess í stað meiri karaktera úr hópnum. Það er stór spurning hvaða leikmenn ætla stíga upp og vera leiðtogar innan sem utan vallar. Það er augljóst að einn leikmaður mun ekki fara í þau fótspor sem Gunnar Þorsteinsson skilur eftir sig, en þess í stað gætu fleiri leikmenn tekið að sér leiðtogahlutverk í liðinu.

Hópurinn er algjört spurningamerki, til þess að liðið ætli sér að komast upp um deild verður allt að ganga upp. Hópurinn þarf að vera þéttur og sterkustu leikmenn liðsins þurfa að vera heilir í sumar svo að liðið nái að hala inn stig. Liðið mun vera háð því hvort gæðaleikmenn liðsins séu heilir eða ekki. Liðið spilaði á mörgum óþekktum nöfnum fyrir hinn almenna áhugamann í vetur og vonandi gefur það liðinu ákveðið boozt að eiga fleiri leikmenn sem geta komið inní liðið.

Ég tel að þá sé alltaf veikleiki þegar lið eru að sækja sér leikmenn rétt fyrir mót, en Grindvíkingar þekkja það mjög vel. Liðið þarf að vera klárt þegar mótið hefst því að hvert stig mun skipta máli fyrir liðið í byrjun móts.

Lykilmenn: Aron Jóhannsson, Tiago Fernandes og Sigurður Bjartur Hallsson

Fylgist með: Ólafur Guðmundsson
Enginn annar leikmaður sem kemur til greina hér. Persónulega er ég búinn að bíða eftir því að það komi eitthvað frá Ólafi í meistaraflokki. Leikmaður sem hefur verið mjög lofandi upp yngri flokka og yngri landslið Íslands. Ég er spenntur að sjá hvort hann stimpli sig inn sem einn af bestu leikmönnum deildarinnar þegar upp er staðið.

Komnir:
Anton Ingi Rúnarsson frá GG
Aron Dagur Birnuson frá KA
Dion Acoff frá Þrótti R.
Freyr Jónsson frá KA
Ólafur Guðmundsson frá Breiðablik
Tiago Fernandes frá Fram
Walid Abdelali frá Finnlandi
Þröstur Mikael Jónasson frá Dalvík/Reyni

Farnir:
Alexander Veigar Þorsteinsson í GG
Baldur Olsen í Ægi (Á láni)
Dusan Lukic í Ægi (Á láni)
Elías Tamburini í ÍA
Guðmundur Magnússon í Fram
Gunnar Þorsteinsson í nám
Gylfi Örn Öfjörð í GG
Hermann Ágúst Björnsson
Ivan Jugovic í GG
Mackenzie Heaney til Whitby Town í Englandi
Oddur Ingi Bjarnason í KR (Var á láni)
Óliver Berg Sigurðsson í Víði (Á láni)

Fyrstu leikir Grindavíkur
7. maí gegn ÍBV á heimavelli
13. maí gegn Þór á útivelli
21. maí gegn Fjölni á heimavelli

1. ÍBV
Alveg eins og í fyrra, þá er ÍBV spáð efsta sæti Lengjudeildarinnar. Tímabilið í fyrra hjá Vestmannaeyingum voru mikil vonbrigði og enduðu þeir að lokum um miðja deild. Þeir hafa bætt öðrum fallbyssum í vopnabúrið en einnig misst leikmenn. Þessi spá var gerð áður en Gary Martin var rekinn frá félaginu en hún breytist þó líklega ekki neitt við það.

Þjálfarinn: Helgi Sigurðsson er að fara inn í sitt annað tímabil sem þjálfari ÍBV. Helgi er fyrrum landsliðsframherji sem þjálfaði Fylki áður en hann tók við ÍBV. Hann kom Fylkisliðinu upp í efstu deild og festi liðið þar í sessi. Áður en Helgi tók Fylki var hann aðstoðarþjálfari Víkinga í Reykjavík auk þess sem hann þjálfaði yngri flokka félagsins.

Álit sérfræðings
Eiður Ben Eiríksson, Rafn Markús Vilbergsson og Úlfur Blandon eru sérfræðingar Fótbolta.net fyrir Lengjudeildina í ár. Rafn Markús gefur sitt álit á liði ÍBV.

Lið ÍBV var mjög vel mannað á síðasta tímabili og spáðu flestir liðinu beint upp eftir að hafa fallið árið á undan. Það er klárt mál að sjötta sætið var mikil vonbrigði. Liðið byrjaði mótið vel og tapaði ekki leik fyrr en í níundu umferð, jafnteflin voru alltof mörg og slakur varnarleikur var dýrkeyptur fyrir liðið.

Félagið hefur verið mikið í fréttum á síðustu dögum þar sem óvænt brotthvarf Gary Martin hefur mikið verið rætt. Umræður í kringum málið og allt sem því fylgir er klárlega áfall fyrir liðið, fyrir leikmannahópinn, þjálfara, stjórn og stuðningsmenn. Það eru margir stórir karakterar í liðinu sem munu hjálpa þjálfarateyminu að ýta þessu frá sér og einbeita sér að deildinni. Enda er það mikilvægt þar sem deildin byrjar á tveimur risa leikjum gegn Grindavík og Fram.

Það er klárt mál að ÍBV ætlar sér upp í efstu deild í haust. Helgi hefur styrkt liðið skynsamlega þar sem hann hefur fengið til liðsins mjög öfluga leikmenn í lykilstöður sem allir eiga eftir að styrkja byrjunarliðið mikið. ÍBV gerði mjög vel með því að fá Stefán Inga að láni frá Breiðablik þegar Gary datt út en hann spilaði mjög vel með Grindavík í fyrra þann tíma sem hann var þar. Koma hans minnkar höggið að missa Gary út, þótt auðvitað er hann ekki sami leikmaðurinn. Eftir síðasta tímabil eru allir í Eyjum meðvitaðri hvernig á að nálgast deildina og reynslunni ríkari. Heimavöllurinn þarf að gefa meira en liðið vann aðeins fjóra leiki á Hásteinsvelli.

Sigur ÍBV í bikarnum gegn Kórdrengum þar sem Guðjón Pétur tryggði liðinu vítaspyrnukeppni á 124. mínútu var mikilvægur móralslega fyrir liðið. ÍBV hefur allt sem þarf til að komast upp úr deildinni, sterkan leikmannahóp, gott þjálfarateymi, áhugasama stjórn, sterka styrktaraðila og öfluga stuðningsmenn. Allt eru þetta stoðir sem ýta undir góðan árangur, en til þess að markmið liðsins náist þarf allt að smella saman; leikmennirnir sem spiluðu í fyrra þurfa að koma öflugri til leiks, varnarleikurinn þarf að vera stöðugri og Gonzalo, Eiður Aron, Guðjón Pétur, Sigurður Grétar og Stefán Ingi þurfa allir að taka á sig stór hlutverk og vera þeir leikmenn sem Helgi ætlast til af þeim.

Lykilmenn: Eiður Aron Sigurbjörnsson, Guðjón Pétur Lýðsson og Telmo Castanheira

Fylgist með: Gonzalo Zamorano
Það verður gaman að sjá Gonzalo Zamorano í Eyjum. Hann kom fyrst til Íslands árið 2017 þegar hann skoraði mikið fyrir Hugin í 2. deildinni. Hann hefur skorað yfir 20 mörk með Víkingi Ólafsvík á tveimur tímabilum í Lengjudeildinni, en á Ólafsvík er hann í miklum metum. Hann var einn besti leikmaður Lengjudeildarinnar í fyrra og hlutverkið hans hefur stækkað enn meira í liði ÍBV eftir að Gary Martin hvarf á braut.

Komnir:
Eiður Aron Sigurbjörnsson frá Val
Gonzalo Zamorano frá Víkingi Ó.
Sigurður Grétar Benónýsson frá Vestra
Stefán Ingi Sigurðarson frá Breiðablik (Á láni)

Farnir:
Bjarni Ólafur Eiríksson
Gary Martin í Selfoss
Jonathan Glenn hættur
Víðir Þorvarðarson í KFS

Fyrstu leikir ÍBV:
7. maí gegn Grindavík á útivelli
14. maí gegn Fram á heimavelli
21. maí gegn Aftureldingu á útivelli

Velkomin til leiks

Komið þið sæl og verið hjartanlega velkomin í beina textalýsingu Fótbolta.net frá leik Grindavíkur og ÍBV í fyrstu umferð Lengjudeildarinnar.

Báðum liðum er spáð velgengni í sumar og að þau verði í baráttunni um að vinna sér inn sæti í Pepsi Max deildinni að ári. Við skulum því kynna okkur liðin og spá sérfræðinga Fótbolta.net um þau.